Bıyl óńirlerge 807 jedel járdem kóligi satyp alynady
NUR-SULTAN. QazAqparat - Bıyl óńirlerge 807 jedel járdem kóligi satyp alynady. Bul týraly Ulttyq shuǵyl medıtsınany úılestirý ortalyǵy basqarma tóraǵasynyń mindetin atqarýshy Baýyrjan Júsipov aıtty, dep habarlaıdy QazAqparat tilshisi.
«Qazaqstan boıynsha jedel medıtsınalyq kómek qyzmeti 18 derbes jedel medıtsınalyq kómek stansysynan, 87 qalalyq kishi stansydan jáne 288 aýdandyq jedel kómek bólimshesinen turady. Respýblıka boıynsha jedel kómek shaqyrtýlaryna 1400-ge jýyq jedel medıtsınalyq kómek brıgadasy qyzmet kórsetedi. Onyń 23 paıyzy mamandandyrylǵan dárigerlik brıgada, 77 feldsherlik brıgada sanalady», - dedi ol Ortalyq kommýnıkatsııalar qyzmetindegi brıfıng barysynda.
Onyń atap ótýinshe, elimizde sanıtarlyq avtokólikpen jabdyqtalý 93 paıyzdy quraıdy. Qazirgi tańda 1967 sanıtarlyq avtokólik bar. 2019 jyly jedel kómek avtokólikteriniń tapshylyǵyn jabý maqsatynda óńirlerde 293 kólik satyp alyndy.
«Bıyl 807 kólik satyp alý josparlanyp otyr. Barlyq kólikter otandyq avtokólik óndirýshilerden lızıng aıasynda satyp alynatyn bolady. Qazirgi ýaqytta jedel kómek kólikterin kezeń-kezeńimen daıyndaý jáne jetkizý júrgizilip jatyr. Jalpy barlyq kólikter osy jyldyń qarasha aıynyń sońyna deıin paıdalanýǵa beriledi», - dedi Baýyrjan Júsipov.
