Bıyl óńirlerde 995 mlrd teńgeniń 206 jobasy iske qosylady

NUR-SULTAN. QazAqparat – Bıyl óńirlerde jalpy somasy 995 mlrd teńgeni quraıtyn 206 jobany iske qosý josparlanǵan. Bul týraly búgin Úkimet otyrysynda Indýstrııalandyrý kartasy máseleleri boıynsha baıandaǵan QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Mınıstrlik óńirlermen birlesip, ónerkásiptiń túrli sektorlaryn qamtıtyn Indýstrııalandyrý kartalaryn jasady. Onda oblystardyń erekshelikteri men básekelestik artyqshylyqtary eskerilgen. Bıyl óńirlerde jalpy somasy 995 mlrd teńgeni quraıtyn 206 jobany iske qosý josparlanǵan. 18 myńnan astam jańa turaqty jumys orny ashylady. Salalar boıynsha alsaq, eń kóp jańa óndiris agroónerkásip kesheni men tamaq ónerkásibinde – 76 joba. Qurylys materıaldary men mashına jasaý salasynda – tıisinshe 38 jáne 19 jobadan», - dedi ol.

Mınıstrdiń atap ótýinshe, 2020 jyldyń 8 aıynda jalpy somasy 204 mlrd teńgeni quraıtyn 28 joba paıdalanýǵa berilip, 4300 jumys orny ashyldy.

«Úshinshi toqsanda jalpy somasy 97 mlrd teńgeni quraıtyn 14 joba iske qosylady dep josparlanyp otyr. Jobalardyń negizgi bóligi bıyl tórtinshi toqsanynda iske qosylady. Jalpy jobalar keste boıynsha júzege asyrylýda. Problemalyq máseleler ákimdiktermen birlesip sheshilýde. Іske qosylatyn jobalardyń ınvestıtsııa kólemi boıynsha Qaraǵandy, Aqtóbe jáne Almaty oblystary aldyńǵy qatarda», - deıdi Beıbit Atamqulov.