Bıyl óńesh pen asqazannyń, tamaq asty bezderiniń qaterli isikterin erte kezeńde anyqtaý skrınıngi júrgiziledi
ASTANA. 23 qańtar. QazAqparat - Elordanyń densaýlyq saqtaý qyzmetkerleri eń kóp taraǵan jáne qaýipti aýrýlardyń aldyn alý, sonymen birge erte kezeńinde anyqtaý maqsatynda turǵyndardy turaqty túrde tekserýden ótkizip turady.
2012 jyly osy baǵytta 417 926 adam skrınıngtik tekserýden ótti. Bul týraly Astana qalasynyń Densaýlyq saqtaý basqarmasy málim etti.
Elordanyń resmı saıtynyń jazýynsha, skrınıngtik baǵdarlamaǵa engizilgen aýrýlar tizbesi óte kóp. Olar: sút bezi, jatyr moıny, tik shek qaterli isikteri, glaýkoma, qan aınalymynyń buzylýy aýrýlary, balalar men jasóspirimderde bolatyn «V» jáne «S» gepatıti, sondaı-aq, jańa týǵan sábılerde kezdesetin týabitti nemese tuqym qýalaýshylyq syrqaty. Sonymen qatar bıylǵy jyly óńesh pen asqazannyń, baýyr men tamaq asty bezderiniń qaterli isikterin erte kezeńde anyqtaý maqsatynda skrınıng júrgiziletin bolady.
Skrınıngtik-tekserý júrek-qan tamyrlary, onkologııalyq, sondaı-aq, týabitti syrqattardy, taǵy basqa da aýrýlardy erte kezeńinde anyqtaýdyń negizgi múmkindikteriniń biri ekendigi dáleldendi. Sondyqtan, qalanyń árbir emhanasynda quramynda profılaktıka jáne áleýmettik-psıhologııalyq kómek bólimshesi bar skrınıngtik tekserý kabınetteri jasaqtalǵan. Tekserilý tegin júrgiziledi.
