Bıyl óndiristerde 78 adam mert boldy - mınıstrlik
ASTANA. 26 sáýir. QazAqparat - Qazaqstanda bıyl óndiristerde 78 adam mert boldy.
Bul týraly búgin Dúnıejúzilik eńbekti qorǵaý kúnine oraılastyrylǵan konferentsııa barysynda QR Eńbek mınıstrligi eńbek jáne halyqty áleýmettik qorǵaý komıtetiniń tóraǵasy Serikqalı Besaqaev málim etti.
«Elimizde qaıǵyly oqıǵalardyń eń bıik deńgeıi 2006 jyly tirkeldi. Sol jyly óndiriste 470 adam opat boldy. 2011 jyly 332 adam kóz jumyp, bul san 29 paıyzǵa azaıdy. Bıyl birinshi toqsanda 78 adam mert boldy, bul ótken jyldyń kórsetkishinen 7 paıyzǵa tómen. Azaıdy eken dep qaıǵyly jaǵdaılardyń aldyn alýda qol qýsyryp, qarap otyrmaýymyz kerek. Eýropa jáne álemniń basqa da damyǵan elderimen salystyrǵanda 1 myń adamǵa shaqqanda óndiriste qaıtys bolatyndardyń sany eki ese joǵary», - deıdi ol.
Onyń aıtýynsha, 2005 jylǵa deıin adam shyǵyny kóp bolǵan eń qaýipti óndiristerdiń kóshin taý-ken, metallýrgııa salasy bastaǵan bolsa, qazirgi ýaqytta tizimniń aldyna qurylys salasy shyǵyp otyr.
