Bıyl óńdeý sektorynyń ósimin 2,5 protsentke qamtamasyz etemiz - Jeńis Qasymbek
ASTANA. QazAqparat - 2017 jyldyń 4 aıynda óndiristik ónerkásip kólemi 7,1 protsentke ósti. Bul týraly búgin halyqpen eseptik kezdesý ótkizip jatqan QR Investıtsııalar jáne damý mınıstri Jeńisbek Qasymbek málim etti, dep habarlaıdy QazAqparat.
«2017 jyldyń 4 aıynyń qorytyndysy boıynsha óndiristik ónerkásip kólemi 7,1 protsenntke ósti. Onyń ishinde taý-ken óndirý ónerkásibi - 7,8, óńdeý ónerkásibi - 6,8, tústi metallýrgııanyń ósimi esebinen - 7,9, qara metallýrgııa 9,3 jáne farmatsevtıka 49,7 protsentke artyp otyr», - dedi mınıstr.
Onyń aıtýynsha, 2016 jyly Indýstrııalandyrý kartasy aıasynda quny 878 mlrd. teńge bolatyn 130 joba iske qosylyp, 10 myń turaqty jumys oryny ashyldy. Karta jobalary ótken jyly 2,2 trln. teńgeniń ónimin óndirdi. Onyń 1,4 trln. teńgesi óńdeý ónerkásibine tıesili. Bul - jalpy sektordyń 18 protsentten astamyn quraıdy.
«Bıyl jalpy somasy 700 mlrd. teńge bolatyn 100-den astam joba júzege asyrylady. Bul jobalar arqyly taǵy da 10 myń turaqty jumys orny ashylady. Jalpy, ónerkásip jańa jaǵdaılarǵa, teńgeniń jańa baǵamyna beıimdeldi. Bıylǵy jyldyń qorytyndysy boıynsha biz óńdeý sektorynyń ósimin 2,5 protsentke deıin qamtamasyz etýdi josparlap otyrmyz»,- dedi Jeńis Qasymbek.
