Bıyl oqýshylardyń 9 % mektep muǵalimi mamandyǵyn tańdady - mınıstr

NUR-SULTAN. QazAqparat - Bilim jáne ǵylym mınıstri Ashat Aımaǵambetov áleýmettik jelidegi paraqshasyna qazaqstandyq jasóspirimderdiń mamandyq tańdaýy týraly oıyn jazdy, dep habarlaıdy QazAqparat.

«Búgin bilim sapasy boıynsha elderdiń reıtıngisi retinde jıi qabyldanatyn zertteý týraly jazǵym keledi. Áńgime PISA zertteýi týraly bolyp otyr», - degen vedomstvo basshysy PISA-nyń kóptegen reıtıngten aıyrmashylyǵy - upaılardy ǵana emes, sonymen birge kontekstik faktorlardy da zertteıtinin aıtady.

«Osyndaı faktorlardyń biri – 15 jastaǵy oqýshylardyń mansaptyq josparlary. Osy týraly qysqasha túsindire keteıin.

1. Qazaqstanda jasóspirimderdiń jartysynan kóbi keń taralǵan mamandyqtardy tańdaıdy.

2. Zertteýdiń barlyq úsh tsıklinde mansaptyq tańdaýdyń aldyńǵy qatarynda dáriger mamandyǵy tur. Mysaly, jalpy tájirıbelik dáriger PISA-2022 (9%), PISA-2015 (10%) jáne PISA-2018 (5%) zertteýinde eń jıi tańdalǵan.

3. Jasóspirimderdiń pedagog mamandyǵyna qyzyǵýshylyqtary aıtarlyqtaı artqanyn zertteýler de kórsetti. Meniń oıymsha, bul - bizdiń muǵalim mártebesin kóterýge baǵyttalǵan jumysymyzdyń nátıjesi. Zertteýdiń úsh tsıkli ishinde osy mamandyqqa qyzyǵýshylyq tanytqan oqýshylardvń úlesi eki esege nemese 5%-ǵa ósti. Atap aıtqanda, osy mamandyqty tańdaý boıynsha PISA 2015 zertteýinde 7-oryn bolsa, al PISA-2022-de 2-orynǵa deıin kóterildi. 2022 jyly oqýshylardyń 9%-y «Jalpy bilim beretin mekteptegi muǵalim» mamandyǵyn bolashaq mamandyǵy retinde tańdady.

4. PISA-2022 zertteýiniń qorytyndysy boıynsha tańdaýly mamandyqtardyń alǵashqy ondyǵyna AKT mamandyqtary kiredi dep kútilip otyr.

5. Sonymen qatar jıi tańdalatyn mamandyqtardyń ondyǵyna jańa mamandyqtar endi. Bul - «Stomatologtar» (4%), «Taýarlar men kıim dızaınerleri» (3%), «Ǵımarattar men qurylystardyń sáýletshileri» (3%), «Sport jattyqtyrýshylary, nusqaýshylary jáne sport salasyndaǵy mamandar» (2%), «Psıhologtar» (2%), «Kosmetologtar jáne olarmen baılanysty mamandar» (1%), «Jarnama jáne marketıng salasyndaǵy mamandar» (1%), «Grafıkalyq jáne mýltımedııalyq dızaınerler» (1%).

Jaqynda mektep túlekterine jazǵan hatymda aıtqan bolashaq mamandyqty tańdaýǵa qatysty usynystarymdy taǵy da eske salǵym keledi», - degen mınıstr.