Bıyl oqýlyqtar tolyqtaı tsıfrlyq formatqa kóshiriledi

NUR-SULTAN. QazAqparat – Jyl sońyna deıin oqýlyqtar tolyqtaı tsıfrlyq formatqa kóshiriledi. Bul týraly Úkimet otyrysynda tehnologııalyq serpilis ulttyq jobasyn talqylaý kezinde Tsıfrlyq damý, ınnovatsııalar jáne aeroǵarysh ónerkásibi mınıstri Baǵdat Mýsın aıtty, dep habarlaıdy QazAqparat tilshisi.

«Bilim berýdi tsıfrlandyrý boıynsha mańyzdy jobalardyń biri - oqýlyqtar portfelin tsıfrlyq formatqa kóshirý. Búginde qolda bar 670 oqýlyqtyń 97 paıyzy tsıfrlyq formatqa kóshirildi. Jyl sońyna deıin 100 paıyz tsıfrlanady», - dedi B. Mýsın.

Onyń aıtýynsha, jalpy aýyldaǵy mektepterge deıin ınternet ınfraqurylymy tolyq jetkizildi.

«Alaıda mektep ishindegi ınternetti taratý jelileriniń bolmaýynan aýyl mektepterinde bilim berý úderisin tsıfrlandyrý tómen deńgeıde bolyp otyr. Osyǵan oraı ákimdikter oqý protsesinde ınternetti 100% paıdalaný maqsatynda mektep ishinde ınternetti taratý jelilerin qamtamasyz etý kerek», - dedi mınıstr.

Sonymen qatar ol densaýlyq saqtaý salasyna toqtaldy.

«Memleket basshysy densaýlyq saqtaýdy tsıfrlandyrý óte baıaý júrip jatqanyn atap ótken bolatyn. Munda biz Densaýlyq saqtaý mınıstrligimen birlesip eHealth elektrondy densaýlyq saqtaýdyń jańa arhıtektýrasyna kóshý boıynsha jumystar júrgizip jatyrmyz. Bul azamattardyń ulttyq densaýlyq pasportyn qurýǵa múmkindik beredi. Onda adamdar medıtsınalyq qyzmet kórsetý ornyna qaramastan, barlyq dıagnozdardy, taldaýlardy jáne basqa da aqparatty kóre alady. Munda Densaýlyq saqtaý mınıstrligi medıtsınalyq qyzmetti qashyqtan belsendi paıdalanýǵa yntalandyratyn tıisti quqyqtyq aktilerdi qabyldaý qajet», - dedi vedomstvo basshysy.

Osyǵan deıin testileý rejıminde jer qoınaýy týraly aqparat beretin portal iske qosylatynyn habarlaǵan edik.