Bıyl OQO-dan Qyzyljar aýdanyna 16 januıa birjola qonys aýdardy
PETROPAVL. QazAqparat - Jergilikti turǵyndardyń aıtýynsha, byltyr myna aýmaqta kóneden qalǵan úılerdiń qırandylary jatqan. Jáne ony jaǵalaı kári aǵashtar ósip turypty. Qazir onyń biri de joq. Bos jatqan jerdi Sheralıevter áýleti birneshe jylǵa jalǵa alyp, 4 Ga-jerdi egistikke yńǵaılap óńdegen. Kóktemde osy alqapqa oramjapyraqtyń 7 túrin, odan basqa qyzanaq, sábiz, qııar syndy kókónisterdiń tuqymdaryn sińiripti. Dánderin Golandııadan arnaıy tapsyryspen aldyrtqan. Qazir Ýmaralı Begalıev jerdi qopsytyp, jaǵalaı qaýlap ósken aram shópterdi julyp, kókónisterdi baptaýda.
Ýmaralı Begalıev - Sokolovka selosynyń turǵyny, Qyzyljar aýdany:
- Jeri jaqsy, jumsaq. Sýdy Esil ózeninen alamyz. Keleshekte jerdiń aýmaǵyn ulǵaıtpaqshymyz. Bul jerdiń aýa raıy maǵan jaqsy jaǵyp jatyr. Dalada keń tynystap, jumys istegende sharshamaı ózimdi jeńil sezinip júremin. Jan-jaǵymda aqqaıyń aǵashtary ósip tur. Ne degenmen de aýasy taza. SQO-na kelgenime qýanamyn.
Úıdiń úlkeni - Ýmaralı Begalıev OQO-nan ata-anasy, inisi Akbaralı, qaryndasy Nafısamen byltyr kúzde Sokolovka aýylyna birjola kóship kelipti. Óńirimizge qonys aýdarýshylar jaqynda memleketten bir rettik - jıyntyq quny 912 myń teńgeniń kótermeaqysyn aldy. Kúngeıden kelgender ázirge baspanany jaldap turmaq. Sheralıevter áýleti negizgi tabys kózin baǵbandyq isten aıyryp otyr. Maýsynyń ortasynan 2,5 tonna qııar jınap, tabıǵı taza ónimdi oblys ortalyǵyndaǵy «ıÝjnyı» bazary men kórshiles aýyldardaǵy dúkenderge kóterme baǵamen (120 tg.) ótkizipti. Maýsymdyq jumysqa tartylǵan barlyǵy 15 adam eńbegimizdiń aqysyn kúndegisin alyp turamyz deıdi.
Valentına Kılına - Sokolovka selosynyń turǵyny, Qyzyljar aýdany:
- Biz osy jerdegi barlyq jumystardy atqaramyz. Kóktemde tuqymdardy jerge sińirip, udaıy aram-shópterdi julamyz, jerdi qopsytamyz. Jaz boıy kókónisterge kútim jasap, ónim jınaýǵa atsalysamyz. Eńbekaqymyz aıyna 30 myń teńgeden shyǵady. Jumys ornym úıime jaqyn.
Baǵbandyq - mashaqaty kóp is ári odan túsken kiris aınalym qarajatyn tolyqtyrýǵa jetpeıtin kórinedi.
Akbaralı Begalıev - Sokolovka selosynyń turǵyny, Qyzyljar aýdany:
- Jergilikti bılikke jáne isker azamattarǵa ótinishim bar. Maǵan qoly ashyq azamattar nemese bankter 2017 jyly 6 aıǵa 5 paıyzdyq ústemeaqymen3 mln aqsha qaryzǵa berse deımin. Ol qarajat maǵan aýyl sharýashalyǵymen aınalysý, aınalym qarajatyn tolyqtyrý úshin qajet.
Ózbek aǵaıyndarynyń keleshekte 30 bas sıyr alyp, sút jáne et satý isimen myqtap aınalysý josparlarynda bar eken.
Jalpy osy jyly Qyzyljar aýdanyna Ońtústikten 16 otbasy qonys aýraǵan. Barlyǵyna jıyntyq quny 5 mln. 270 myń. teńgeden artyq kótermeaqy berildi. Jyl sońyna deıin atalmysh aýdanǵa 2 januıa kóship keledi, dep habarlady mtrk.kz.
