Bıyl oblystyq jáne aýdandyq joldarǵa 76,6 mlrd teńge bólinedi

NUR-SULTAN. QazAqparat – Bıyl oblystyq jáne aýdandyq mańyzy bar joldardy damytýǵa 76,6 mlrd teńge kózdelgen. Bul týraly Úkimet otyrysynda QR Indýstrııa jáne ınfraqurylymdyq damý mınıstri Beıbit Atamqulov aıtty, dep habarlaıdy QazAqparat tilshisi.

«Jergilikti joldardyń jalpy uzyndyǵy 71 myń shaqyrymdy quraıdy. Atqarylǵan jumystar esebinen ótken jyldary jergilikti joldardyń 75 paıyzy normatıvtik jaǵdaıǵa keltirildi. Bıyl oblystyq jáne aýdandyq mańyzy bar joldardy damytýǵa 76,6 mlrd teńge kózdelip otyr», - dedi Beıbit Atamqulov.

Onyń atap ótýinshe, bólingen qarajat esebinen jol jóndeý jumystarynyń barlyq túrimen 1,3 myń shaqyrym qamtylady.

«2025 jylǵa deıin 27 myń shaqyrym joldy barlyq jumys túrimen qamtý kózdelgen. Jalpy joldyń 95 paıyzyn normatıvtik jaǵdaıǵa jetkizý josparlanyp otyr. Osylaısha, 3 myńnan astam aýyldy kirme joldarmen qamtamasyz etemiz», - dedi mınıstr.