Bıyl «Nurly jermen» Taldyqorǵanda 166 kottedj paıdalanýǵa beriledi
TALDYQORǴAN.QazAqparat - Taldyqorǵannyń ońtústik-shyǵys yqsham aýdanynda kottedj qalashyǵynyń qurylysy qyzý júrip jatyr. Bıyl jyl sońyna deıin 166 kottedj aıaqtalady dep josparlanýda. Bul jóninde halyq aldynda esep bergen qala ákimi Baǵdat Qarasaev málim etti, dep habarlaıdy QazAqparat tilshisi.
«Ótken jyly «Nurly jer» baǵdarlamasy boıynsha Ońtústik-Shyǵys yqsham aýdanynda kottedj qalashyǵynyń qurylysy bastaldy. Bul maqsatqa 104 gektar jer bólinip, ınjenerlik jelileri tartyldy. Jobaǵa sáıkes munda 606 páterge arnalǵan 570 kottedj salynady. Bıyl jyl aıaǵyna deıin 202 páterge arnalǵan 166 kottedjdiń qurylysy aıaqtalady dep josparlanýda», dedi qala basshysy.
Sondaı-aq, bıyl Taldyqorǵanda 9 kópqabatty úı salynyp, 1 myńnan asa turǵyn qonys toıyn toılaıdy dep kútilýde. Onyń ishinde 6 nesıelik,1 arendalyq, 2 kommýnaldyq kópqabatty úı bar.
Al qala boıynsha baspana kezeginde 15 myńnan astam turǵyn tur.
