Bıyl Nur-Sultanda 7 kompanııa kómir satatyn bolady

NUR-SULTAN. QazAqparat – Nur-Sultan qalasynyń ákimdiginde ótken brıfıngte aldaǵy jylytý maýsymyna daıyndyq barysy baıandaldy, dep habarlaıdy QazAqparat tilshisi.

El astanasynyń jylytý maýsymyna daıyndyǵy qaı deńgeıde ekenin Nur-Sultan qalasynyń otyn-energetıkalyq keshen jáne kommýnaldyq sharýashylyq basqarmasynyń basshysy Erbol Tóleýov aıtty.

«Halyqty jylytý maýsymy jaqyndaǵan tusta dúrbeleń týǵyzbas úshin qajet kómirdi jaz ortasynda qamdaýǵa shaqyramyz. Elorda boıynsha kómir satýmen aınalysatyn 7 iri kompanııa bekitildi. Olardyń bárimen baǵany kótermeý boıynsha memorandýmǵa qol qoıdyq. Kómirdiń ár tonnasy sapasyna qaraı 12-14 myń teńgeden satylady degen meje bar. Endigi másele kómirdi ken ornynan jetkizetin «Qazaqstan temir joly» ulttyq kompanııasy men kómir óndirýshi kásiporyndarǵa baılanysty. Olar baǵany kótermese, jylytý maýsymynyń aıaǵyna deıin osy baǵa saqtalady», - dedi basqarma basshysy.

Qazirgi tańda atalǵan 7 kompanııanyń qoımasyna 19007,2 tonna kómir ákelingen. Byltyr elorda turǵyndary men jylý qazandyqtary 420 myń tonna kómir tutynǵan eken.

Bıylǵy maýsymda kómir satýshy kompanııalardyń tizimi tómendegideı:

Gertsen k., 6/2 mekenjaıy boıynsha «Magnıt 21 vek» JShS, Gertsen k. 6B mekenjaıy boıynsha «Aıtqojynova» JK, Dýlatov k. 182/1 mekenjaıy boıynsha «Ýmar KZ» JShS, Jubanov k. 35 mekenjaıy boıynsha «Bek Aıda» JShS, Gertsen k. 4/1 mekenjaıy boıynsha «Severenergoýgolsnab» JShS, Kóktal 28/1 mekenjaıy boıynsha «Jiger Astana» JShS, №40 stansa mekenjaıy boıynsha «Sabına» JShS kómir satady.