Bıyl Nur-Sultanda 150 myńǵa jýyq patsıent tegin dári-dármekpen qamtyldy

NUR-SULTAN. QazAqparat – Jyl basynan beri 147 173 elorda turǵyny Áleýmettik-medıtsınalyq saqtandyrý qory tarapynan tegin dári-dármekpen qamtamasyz etildi, dep habarlaıdy QazAqparat tilshisi.

«Áleýmettik-medıtsınalyq saqtandyrý qory tarapynan maqsatty toptaǵy patsıentterdi dári-dármekpen qamtamasyz etýge erekshe kóńil bólinip jatyr. 2021 jyldyń І jartyjyldyǵynda Nur-Sultan qalasynda 5, 43 mlrd teńge somasyna 438 057 tegin retsept boıynsha 147 173 patsıent tegin dári-dármekpen qamtamasyz etildi» dep atap ótti Áleýmettik-medıtsınalyq saqtandyrý qorynyń Nur-Sultan qalasy boıynsha fılıalynyń dırektory Nurlybek Qabdyqaparov ZOOM platformasynda ótken baspasóz máslıhatynda.

Onyń aıtýynsha, qor densaýlyq saqtaý basqarmalarynyń aldynda dári-dármekpen qamtamasyz etýge jatatyn barlyq patsıentterdi qamtý týraly máseleni birneshe ret kótergen.

«Bıyl bul máseleni sheshýde ilgerileý bar, aldaǵy ýaqytta da bul problemaǵa monıtorıng júrgiziledi. Sebebi, bizdiń qor patsıentterdi dári-dármekpen qamtamasyz etýdi qarjylandyrý boıynsha SQ-Farmatsııa jáne medıtsınalyq uıymdar aldyndaǵy óz mindettemelerin tolyq oryndaıdy», - deıdi ol.

Buǵan deıin elordada ambýlatorııalyq-emhanalyq medıtsınalyq qyzmetke bólinetin qarajat kóleminiń artatynyn habarlaǵan bolatynbyz.