Bıyl Nur-Sultanda 15 jańa mektep salynady
NUR-SULTAN. QazAqparat – Bıyl elordada jańadan 15 mektep salynady. Bul týraly Nur-Sultan qalasynyń ákimi Altaı Kólginov málim etti, dep habarlaıdy QazAqparat tilshisi.
«Pandemııaǵa qaramastan elordada mektep qurylysy toqtaǵan joq. Sebebi bizde úsh aýysymdy mektep problemasy bar, olardyń sany - 8. Odan bólek, oqýshylar sany shekten tys mektepter bar, olardyń sany - 22. Búginde úsh aýysymdy mektep máselesi 2 esege azaısa, shekten tys oqýshysy bar mektep 22-den 14-ke deıin azaıyp otyr. Statıstıkaǵa kelsek, 2019 jyly qalada 6 myń oryndyq mektep salyndy, 2020 jyly 10 myńnan astam oryndyq mektep salyndy. Al bıyl 40 myń balany qamtıtyn 15 jańa mektepti turǵyzyp, paıdalanýǵa berý josparlanyp otyr», - dedi A. Kólginov Astana telearnasyna bergen suhbatynda.
Sondaı-aq, qala basshysy elordalyqtardy jıi mazalaıtyn qoljetimdi baspana máselesin sóz etti.
«Búginde elordada 48 myńnan astam adam baspana kezeginde tur. Onyń ishinde ártúrli deńgeıdegi áleýmettik top ókilderi bar. Qoljetimdi baspana máselesi de jyl ótken saıyn óz sheshimin taýyp keledi. Aıtar bolsaq, 2018 jyly 1100 baspana berilse, 2019 jyly 2209 baspana berildi, ótken jyly 7 myńnan astam páter ıesi qonys toıyn toılady. Bıyl bul úrdis odan ári jalǵasyp, 10 myńnan astam páter kiltin tabys etý josparymyzda bar», - deıdi ol.
