Bıyl Nur-Sultanda 100 myń aǵash kósheti otyrǵyzylady
NUR-SULTAN. QazAqparat - Elordada kóktemgi gúl otyrǵyzý jumystaryna daıyndyq júrgizilýde, dep habarlaıdy QazAqparat qala ákimdigine silteme jasap.
Osy oraıda, Nur-Sultan ákiminiń orynbasary Altynbek Qaısaǵalıev «Jasyl jer» JShS jáne «Astana-Zelenstroı» JShS jylyjaılaryna bardy. Kógaldandyrý jáne abattandyrý jospary aıasynda aǵymdaǵy jyly elordada gúlzarlardaǵy gúlder sanyn 6 mln danaǵa deıin ulǵaıtý josparlanýda. Osy jumystardy júrgizý úshin qala kósheleri, aýlalar men qoǵamdyq keńistikter retke keltiriledi. «Astana-Zelenstroı» men «Jasyl jer» kompanııalarynyń jylyjaılarynda búginge deıin 4,5 mln-nan astam gúl ósirilgen.
Altynbek Qaısaǵalıevtiń aıtýynsha, barlyq tuqymdar standarttarǵa sáıkestigi boıynsha zerthanalyq zertteýlerden ótedi. Qala ákiminiń orynbasary «Astana-Zelenstroı» JShS-niń orman pıtomnıginde bolyp, jaǵdaıymen tanysty. 350 ga jerdi alatyn pıtomnıkte 60 túr boıynsha 300 myńnan astam kóshet ósirilýde.
«Bıyl kóshetterdi jappaı otyrǵyzýdy jalǵastyratyn bolamyz. Alýan túrli aǵashtyń 100 myńyn egý josparlanǵan. Qazirgi ýaqytta otyrǵyzý oryndaryn daıyndaý júrgizilýde. Sondaı-aq, elorda kóshelerinde, saıabaqtar men tynymbaqtarda qoqystardy jınaý boıynsha ekologııalyq is-sharalar júrgiziletin bolady. Elordanyń landshaftyq dızaınyn jaqsartý boıynsha, onyń ishinde biregeı florıstıkalyq sheshimder arqyly jumystar júrgizilýde», - dedi Nur-Sultan qalasy ákiminiń orynbasary Altynbek Qaısaǵalıev.
