Bıyl Nur-Sultan JOO-laryna qansha stýdent qabyldandy
«JANA BELES 2019» jobasyn Nur-Sultan qalasy qoǵamdyq damý isteri basqarmasy men Nur-Sultan qalasy ákimdiginiń «Astana jastary» KMM uıymdastyrǵan. Dástúrli jıynǵa óz oqý ornynda belsendiligimen kózge túsken 3 myńǵa jýyq stýdent qatysqan.
«Qazir Nur-Sultan qalasynda 16 joǵary oqý orny bar. Onda 82 myńnan astam stýdent bilim alýda. 245 myń jastar belsendi eńbek etýde. Stýdenttik ómir – eń qyzyq ómir. Bilimge, ǵylymǵa, qoǵamdyq ómirge atsalyssańyzdar, naǵyz básekege qabiletti jastar bolatyndaryńyzǵa senemin. Tuńǵysh Prezıdentimiz Elbasy árdaıym elorda jastaryna, Qazaqstan jastaryna úlken úmit artady. Sebebi, qazir árbir azamatqa múmkindik bar. Shetelge bilim alǵylaryńyz kelse, «Bolashaq» baǵdarlamasy bar. 12 myńnan astam qazaqstandyq «Bolashaq» baǵdarlamasymen bilim alyp, Qazaqstanda eńbek etip júr», - dedi qala ákiminiń orynbasary Baqtııar Máken «Qazaqstan» ortalyq kontsert zalynda ótken saltanatty jıynda.
Belsendi stýdentterge qala ákiminiń orynbasary sımvoldyq stýdenttik bılet pen estelik syılyqtar tabystady.
«Saltanatty qabyldaý sharasyna Nur-Sultan qalasynyń 16 joǵarǵy oqý ornynyń stýdentteri qatysýda. Arnaıy krıterııler boıynsha úzdik stýdentterdi iriktep aldyq. Búginde elordalyq joǵary oqý oryndaryndaǵy birinshi kýrs stýdentteriniń sany – 15 myńǵa jýyq. Olardyń basym kóbisi L. Gýmılev atyndaǵy Eýrazııa ulttyq ýnıversıteti men S.Seıfýllın atyndaǵy Qazaq agrotehnıkalyq ýnıversıtetinde oqıdy», - dedi «Astana Jastary» ortalyǵynyń basshysy Shyńǵys Tileýlın.
Aıta keteıik, qala ákimdigi atynan stýdentterge arnaıy jeńildikter qarastyrylǵan. Qoǵamdyq damý isteri basqarmasynyń bas mamany Aqulan Tastemirdiń aıtýynsha, elorda ákimdigi jetim nemese ata-ana qamqorlyǵynsyz qalǵan, sondaı-aq erekshe qajettilikti talap etetin stýdentterdiń kartasyna aı saıyn jol júrý bıletiniń qunyn aýdaryp otyrady.
