Bıyl Nobel syılyǵyn tabystaǵannan keıingi dástúrli kontsert bolmaıdy
ASTANA. QazAqparat - Osloda jyl saıyn beıbitshilik baǵytyndaǵy Nobel syılyǵyn tapsyrǵannan keıin ótkizilip kelgen dástúrli kontsert bıyl bolmaıdy, dep habarlaıdy «QazAqparat» HAA-nyń menshikti tilshisi.
Bul týraly Nobel ınstıtýtynyń, Warner Bros Norway jáne Gyro Event kompanııalarynyń birlesken málimdemesinde aıtylǵan. Uıymdastyrýshylar «kontserttiń formaty men kontentin qaıta qaraý qajettigi jáne sońǵy jyldardaǵy qarjylyq jaǵdaı osyǵan ıtermelep otyrǵanyn» aıtady. Endi olar jańa platformany qarap shyqpaq. Óıtkeni, smartfondar keń taraǵannan keıin, kontserttiń buryn metsenattardyń qarajaty esebinen aqy tólengen «jandy» televızııalyq aýdıtorııasyn burynǵysynsha ustap otyrý múmkin emes. Norvegııadaǵy asa iri bólshek saýda jelileriniń biri osyndaı sharanyń demeýshisi bolǵan edi, biraq uıymdastyrýshylar onyń aqysyn tóleı almaǵan.
Oslodaǵy «Spektrým» arenasynda ótetin dástúrli kontsertke 1994 jyldan beri Ýıtnı Hıýston, Ledı Gaga sekildi júzdegen shoý-juldyzdar kelgen.
Dástúrge oraı, beıbitshilik baǵytyndaǵy Nobel syılyǵyn tabystaý rásimi jyl saıyn shvetsııalyq kásipker ári ónetapqysh Alfred Nobel dúnıe salǵan kúnde - 10 jeltoqsan kúni ótedi.
Syılyqty 1901 jyldan beri Oslodaǵy Nobel beıbitshilik komıteti álemde beıbitshilikti ornatýǵa zor úles qosqan jeke tulǵalarǵa nemese uıymdarǵa tabystap keledi.
