Bıyl negizgi kapıtalǵa 6,1 trln teńge somasynda ınvestıtsııa tartyldy

NUR-SULTAN. QazAqparat – Negizgi kapıtalǵa 6,1 trln teńge somasynda ınvestıtsııa tartyldy. Bul týraly Úkimet otyrysynda bıylǵy qańtar-shildedegi áleýmettik-ekonomıkalyq damý nátıjelerin talqylaý kezinde QR Ulttyq ekonomıka mınıstri Rýslan Dálenov málim etti, dep habarlaıdy QazAqparat tilshisi.

«Negizgi kapıtalǵa 6,1 trln teńge somasynda ınvestıtsııa tartyldy. 13 óńir ósim kórsetti. Eń joǵary ósim Aqmola (29,7%-ke), Soltústik Qazaqstan (18,8%-ke), Túrkistan (18,7%-ke) oblystarynda jáne Shymkent qalasynda (23,4%-ke) baıqalady. 4 óńirde tómendeý tirkeldi. Bul Qyzylorda (-37,1%), Atyraý (-19,9%), Batys Qazaqstan (-9,2%), jáne Qaraǵandy (-9,2%) oblystary», - dedi mınıstr.

Sonymen qatar ol qurylys 6,3 paıyzǵa ulǵaıǵanyn jetkizdi. Qurylys jumystarynyń joǵary ósýi Shymkent qalasynda (58,9%-ke) jáne Túrkistan oblysynda (52,8%-ke) baıqalady.

«7 mln sharshy metr turǵyn úı paıdalanýǵa berildi. Bul ótken jyldyń sáıkes kezeńimen salystyrǵanda 7,5 paıyzǵa kóp», - dedi R. Dálenov.