Bıyl negizgi kapıtalǵa 18,3 trln teńge somasynda ınvestıtsııa tartylmaq

ASTANA. QazAqparat – Bıyl negizgi kapıtalǵa 18,3 trln teńge ınvestıtsııa salynady. Bul týraly Ulttyq ekonomıka mınıstri Álibek Qýantyrov aıtty, dep habarlaıdy QazAqparat tilshisi.

«Úkimet aldyna ınvestıtsııa tartý boıynsha naqty mindetter qoıyldy. Bıyl jospar boıynsha negizgi kapıtalǵa 18,3 trln teńge ınvestıtsııa salynady. Bul kórsetkish byltyrdyń qorytyndysynan 22%-ǵa artyq bolmaq. Shaǵyn jáne orta bıznesti júıeli qoldaý sharalary keńeıtildi. Óńdeý ónerkásibin damytý maqsatynda qoldaý kórsetý úshin qyzmet túrleriniń tizbesi 116-ǵa ulǵaıtyldy», - dedi Á. Qýantyrov Senatta Qazaqstannyń ınvestıtsııalyq ahýaly tartymdylyǵy taqyrybynda ótip jatqan Úkimet saǵatynda.

Onyń aıtýynsha, qyzmettiń birqatar basym túri boıynsha paıyzdyq stavkany sýbsıdııalaý merzimi 5 jyldan 7 jylǵa deıin uzartyldy. Bıznestiń jol kartasyn qarjylandyrý 224 mlrd teńgege deıin ósti.

«Shaǵyn jáne orta bıznesti qoldaý aıasynda bıyl 20 myńnan astam jobany sýbsıdııalaý jáne 18 myńnan astam jobaǵa kepildik berý eskerilgen. Atap aıtqanda, orta bıznesti qoldaý boıynsha qosymsha qadamdar jasalady», - dedi mınıstr.

Budan buryn habarlanǵandaı, Qazaqstanda sheteldik ınvestıtsııanyń basym bóligi shıkizat sektoryna baǵyttalyp jatyr.

Álibek Qýantyrov munaı men gaz salasyna ınvestıtsııa óskenin aıtty.