Bıyl Naýryz jańasha toılanýda - A.Esimov
ATY. 21 naýryz. QazAqparat /Ádilet Musahaev/ - Búgin Almatydaǵy «Astana» alańynda Naýryz meıramyna arnalǵan merekelik sharalar bastalyp ketti.
Qala ákimi Ahmetjan Esimov almatylyqtardy Ulystyń uly kúnimen quttyqtady.
Onyń aıtýynsha, búgin biz kún sáýlesimen nurlanǵan tabıǵat ananyń oıanyp, jańarýyn toılaýdamyz. Bul meıram jańa jyldyń bastaýy retinde atalyp, Naýryz birlik pen yntymaqtastyqty bildirip, beıbitshilik pen kelisimniń, turaqtylyqtyń nyǵaıýynda úlken mańyzǵa ıe.
"Bıyl biz bul meıramdy jańasha atap ótip, úsh kún toılaıtyn bolamyz. Sizderdiń nazarlaryńyzǵa otandyq jáne sheteldik estrada juldyzdarynyń qatysýymen óte qyzyqty baǵdarlamalar usynylady. Erteń bizdiń meıram etnomádenı birlesken baǵdarlamalarmen jalǵasady", -dep atap ótti óz sózinde qala ákimi.
Sonymen qatar A.Esimov bıyl birinshi ret qaladaǵy Saýda ortalyqtarynyń atsalysýymen "Naýryz - jeńildik festıvali" aktsııasy uıymdastyrylǵandyǵyn jáne kóne salt boıynsha Kóktóbede tańdy qarsy alý bolǵandyǵyn, sondaı-aq Medeý parkinde alma aǵash otyrǵyzý rásimi bolǵandyǵyn aıtyp ótti.
Alańǵa jınalǵan qaýym nazaryna akrobattar men shyǵarmashylyq balalar ujymy birqatar shoýlar usyndy. Keshke almatylyqtar otshashý saltanatyn tamashalaıtyn bolady. Al erteń osy alańda etnomádenı birlestiktiń qatysýymen "Biz - Qazaqstan halqymyz" baǵdarlamasy men qazaqstandyq estrada juldyzdary men reseılik ánshi Sergeı Lazarev óner kórsetetin bolady.
