Bıyl naqty qaı joldar paıdalanýǵa beriledi
ASTANA. QazAqparat - Aǵymdaǵy jylda birqatar aımaqtarda joldardyń qurylysy aıaqtalady. Sonyń ishinde aqyly joldar da bar, dep habarlaıdy QazAqparat tilshisi.
QR Investıtsııalar jáne damý mınıstri Jeńis Qasymbektiń aıtýynsha, jyldyń qorytyndysy boıynsha 528 shaqyrym joldy ashý josparlanǵan. Atap aıtqanda, Ortalyq-Shyǵys jobasy boıynsha (Astana-Shiderti ých.) - 233 shaqyrym; Ortalyq-Ońtústik (Temirtaý-Qaraǵandy) - 45 shaqyrym; Oral-Tasqala - 35 shaqyrym; Beıneý-Aqjigit - 85 shaqyrym; Almaty-Taldyqorǵan (Sarqand qalasy aınalma joly) - 16 shaqyrym; Qordaı aýylynyń aınalma joly - 19 shaqyrym; Astana-Petropavl-RF shek.(Qorǵanǵa) - 20 shaqyrym; Taskesken-Bahty - 20 shaqyrym, Şýche-Zerendi - 20 shaqyrym, Taldyqorǵan-Óskemen - 20 shaqyrym, Qalbataý-Maıqapshaǵaı - 9 shaqyrym, Astananyń Ońtústik-Batys aınalma joly - 6 shaqyrym.
«Sonymen qatar, Elbasynyń Joldaýynda berilgen tapsyrma boıynsha jergilikti jerdegi avtokólik joldaryn jóndeý men rekonstrýktsııalaý jumystaryn qarjylandyrýdy ulǵaıtý kózdelip otyr. Bıyl respýblıkalyq jáne jergilikti bıýdjetterden qosymsha 60 mlrd teńge bólinip, qarjylandyrý kólemi 150 mlrd tengege deıin jetedi. Bul sharalar jóndeletin 4000 shaqyrymnan astam joldy qamtýǵa jáne 2025 jylǵa qaraı jergilikti jeliniń jaqsy jáne qanaǵattanarlyq jaǵdaıyn 85%-ǵa deıin jetkizýge múmkindik beredi», - dedi J.Qasymbek Úkimettiń búgingi otyrysynda.
Mınıstrdiń sózine qaraǵanda, búginde Astana-Temirtaý, Almaty-Qapshaǵaı jáne Almaty-Qorǵas ýchaskelerinde aqy tóleý júıesiniń qurylys-montajdaý jumystary atqarylýda. Atalǵan joldarda aqyly júıe bıyl ekinshi toqsanda iske qosylady degen jospar bar. Jalpy, qazirgi kezde 5,5 myń shaqyrym bolatyn 13 ýchaskege aqy alý júıesin ornatý boıynsha jobalyq-smetalyq qujattar ázirlenip jatyr. Sonyń ishinde «Batys Eýropa - Batys Qytaı» halyqaralyq dálizi bar (2,1 myń.km). «Jalpy, 2020 jylǵa deıin aqyly joldardy 6,5 myń shaqyrymǵa deıin jetkizý josparlanyp otyr. Ol shamamen jylyna 30 mlrd teńge tabys ákeledi», - dep atap kórsetti J.Qasymbek.
