Bıyl munaı óndirý kólemi jospardan asýy múmkin

NUR-SULTAN. QazAqparat - Bıyl Qazaqstannyń munaı óndirý josparyn asyra oryndaý múmkindigi bar. Bul týraly búgin Úkimet úıindegi baspasóz máslıhatynda QR Energetıka birinshi vıtse-mınıstri Mahambet Dosmuhambetov aıtty, dep habarlaıdy QazAqparat tilshisi.

«Bıylǵy jyly jospar boıynsha munaı óndirý kólemi 89 mln tonnany quraıdy. Jyl basynan bergi 9 aıdyń ishinde munaı óndirý kólemi 67 mln tonnany qurap, jospardyń oryndalýy 101,7 paıyzǵa jetip otyr. Onyń ishinde úsh iri jobanyń úlesi 40,6 mln tonna boldy. Atap aıtqanda, Qashaǵanda – 10,1 mln tonna, Teńizde – 22 mln tonna, Qarashyǵanaqta – 8,5 mln tonna óndirildi», - dedi ol.

Birinshi vıtse-mınıstrdiń atap ótýinshe, bıyl Qashaǵan men Teńizde josparlanǵan kúrdeli jóndeý jumystary sátti aıaqtaldy.

«Osy jylǵy 15 qyrkúıekten bastap Qarashyǵanaqtyń negizgi óndiristik nysandarynda kúrdeli jóndeý júrgizilip jatyr. Óndiris tolyǵymen toqtatyldy. Jóndeý jumystary 13 qazanǵa deıin jalǵasady. Jóndeý jumystary óńdeý keshenine, gazdy keri aıdaý kompressorlaryna jáne gazdy daıyndaý qondyrǵylaryna júrgizilip jatyr. Ol belgilengen merzimde aıaqtaýy tıis. Munaı óndirý kólemin 89 mln tonnadan asyrýǵa múmkindik bar», - dedi Mahambet Dosmuhambetov.