Bıyl munaı óndirý kólemi ótken jylǵy deńgeıde bolady dep josparlanýda - QR Munaı jáne gaz vıtse-mınıstri
ALMATY. 6 qazan. QazAqparat /Erlik Erjanuly/ - Qazaqstanda bıyl munaı óndirý men ony eksporttaý kólemi ótken jylǵy deńgeıde bolady dep josparlanýda. Bul Almatyda ótip jatqan 19-shy qazaqstandyq "Munaı jáne gaz" halyqaralyq konferentsııasynda aıtyldy.
"Keleshekte munaı óndirý kólemi ósedi dep boljanýda. Máselen, ol 2015 jyly 95 mıllıon tonna bolsa, al 2020 jyly 130 mıllıon tonnaǵa jýyqtamaq. Munaı eksportynyń kólemi de jylyna 71-72 mıllıon tonnany quraıdy dep josparlanyp otyr", - deıdi Munaı jáne gaz vıtse-mınıstri Lıazzat Qıynov. Munaı óndirý kólemi 2010 jyly 80 mıllıon tonnaǵa jetken bolatyn. L. Qıynovtyń aıtýynsha, Keden odaǵy kelisimi boıynsha munaı jáne munaı ónimderin tasymaldaý tarıfteri endi taraptardyń sharýashylyq sýbektileri úshin memlekettik deńgeıde teń jaǵdaıda belgilenedi. Qazaqstandyq eksporterlar endi Reseı, Belarýs elderi aýmaǵynda orystar men belorýstar qoldanatyn mólsherlemeni qoldana alady. Tasymal tarıfter ár elde ulttyq zańnama boıynsha anyqtalatyn bolady.
