Bıyl múgedektigi bar adamdarǵa tehnıkalyq ońaltý quraldary úshin 19,1 mlrd teńge bólindi
QR Eńbek jáne halyqty áleýmettik qorǵaý mınıstrliginiń dereginshe, tehnıkalyq ońaltý quraldarymen jáne ońaltý qyzmetterimen qamtylǵandardyń úlesi 2020 jyl qorytyndysynda 300 myńnan astam adamdy quraıtyndyǵy josparlanǵan. Jalpy, Qazaqstanda múgedektigi bar 695 myń adam turady. Onyń ishinde 424 myń adam eńbekke qabiletti jasta bolsa, 179,7 myń adam – zeınetkerlik jasta, 91,6 myń adam – 18 jasqa deıingi balalar.
2019 jyldyń qorytyndysy boıynsha tehnıkalyq ońaltý quraldarymen jáne ońaltý qyzmetterimen (protezdik-ortopedııalyq kómek, sýrdo-, tıflo quraldar, kreslo-arbalar, sanatorlyq-kýrorttyq emdeý, mindetti gıgıenalyq quraldar, jeke kómekshiniń jáne ymdaý tili mamanynyń qyzmetteri) qamtylǵandar úlesi 292,4 myń adamdy nemese muqtajdardyń jalpy sanynan 69,5 paıyzdy qurady. Bul maqsatqa 7,5 mlrd teńge bólindi.
«2025 jylǵa deıin múgedektigi bar adamdardyń quqyqtaryn qamtamasyz etý jáne ómir súrý sapasyn jaqsartý jónindegi ulttyq jospardy iske asyrý aıasynda múgedektigi bar adamdardy tehnıkalyq ońaltý quraldarymen jáne ońaltý qyzmetterimen tolyq qamtamasyz etý maqsatynda respýblıkalyq bıýdjetten 2020-2022 jyldarǵa 58,3 mlrd teńge bólindi (2020 jyly – 19,1 mlrd teńge, 2021 jyly – 19,4 mlrd teńge, 2022 jyly – 19,8 mlrd teńge)», - dep atap ótedi vedomstvodan.
Esterińizge sala keteıik, 2017 jyly tehnıkalyq ońaltý quraldaryn tizimi ózektendirildi jáne 32-den 55 túrge deıin keńeıtildi. Bul múgedekterge eskirgen pleerler men telefondardyń ornyna jumys jáne oqý úshin zamanaýı noýtbýkter, smartfondar usynýǵa múmkindik berdi. Sondaı-aq, ońaltýdyń qosymsha tehnıkalyq quraldary men mindetti gıgıenalyq quraldar, kórý qabileti buzylǵan adamdarǵa arnalǵan jańa tıflotehnıkalyq quraldar engizildi. Júrip-turýy qıyn birinshi toptaǵy múgedekterge jeke kómekshiniń qyzmetterin usyný qarastyrylǵan, estý qabileti buzylǵan múgedekterge ymdaý tili mamandarynyń qyzmetterin kórsetý ýaqyty jylyna 30 saǵattan 60 saǵatqa deıin ulǵaıtyldy.