Bıyl muǵalimderdiń jalaqysyn kóbeıtýge bıýdjetten 1,2 trln teńge bólingen

ASTANA. QazAqparat - Bıyl respýblıkalyq bıýdjetten muǵalimderdiń jalaqysyn kóbeıtýge, olarǵa biliktilik sanattary, magıstr dárejesi úshin qosymsha aqy tóleýge jáne dene shynyqtyrý muǵalimderiniń sabaqtan tys sabaq ótkizýine 1,2 trln teńge (2,5 mlrd dollar) bólindi. Bul týraly QazAqparat Oqý-aǵartý mınıstrligine silteme jasap habarlaıdy.

Onyń 121,5 mlrd teńgesi mektepke deıingi bilim berý pedagogterine, 1,04 trln teńgesi orta bilim berý uıymdaryna, 39,8 mlrd teńgesi tehnıkalyq jáne kásiptik bilim berý uıymdaryna baǵyttaldy.

2020 jáne 2022 jyldardy salystyratyn bolsaq, pedagogterdiń eńbekaqysyn kóterýge jáne olarǵa ústemaqy tóleýge respýblıkalyq bıýdjetten bólingen qarjy kólemi 3 esege ósken.

«Memleket basshysy Qasym-Jomart Toqaevtyń tapsyrmasy boıynsha 2020 jyldyń qańtarynan bastap muǵalimderdiń jalaqysy jyl saıyn 25%-ǵa kóterilip keledi. 2021-2022 jyldardyń qańtarynda olardyń jalaqysy da taǵy 25%-ǵa ósti. Sáıkesinshe, jyldan jylǵa bilim berý uıymdary qyzmetkerleriniń, ıaǵnı tárbıeshilerdiń, mektepter men kolledjder pedagogteriniń, sondaı-aq qosymsha bilim berý júıesi mamandarynyń eńbekaqysyn arttyrýǵa bólinetin qarajat kólemi ulǵaıyp keledi. Sondaı-aq olar biliktilik sanaty (laýazymdyq jalaqynyń 30%-dan 50%-ǵa deıingi mólsherin), magıstr dárejesi, pánderdi aǵylshyn tilinde oqytqany, dápter teksergeni, synyp jetekshiligi men tálimgerlik qyzmeti úshin qosymsha aqy alady», - dep aıtty QR Oqý-aǵartý mınıstrliginiń Bıýdjettik josparlaý departamentiniń dırektory Ǵalymjan Moldash.