Bıyl «Mereıli otbasy» konkýrsyna qatysý úshin 2285 otbasy ótinish bildirgen

Bul týraly búgin Ortalyq kommýnıkatsııalar qyzmetiniń brıfıngisinde QR Prezıdenti janyndaǵy Áıelder isi jáne otbasy-demografııalyq saıasat jónindegi ulttyq komıssııa tóraǵasynyń orynbasary Lázzát Súleımen málim etti.

"Qazaqstanda qyrkúıektiń ekinshi jeksenbisi otbasy kúni retinde toılanady. Bul - resmı merekelerdiń biri bolyp sanalady. Prezıdenttiń ókimimen osymen ekinshi ret "Mereıli otbasy" ulttyq baıqaýy ótkeli otyr. Memleket turaqty otbasylardyń kóp bolýyna múddeli. Bıyl aýdan, qalalar deńgeıindegi baıqaýlar jaqsy uıymdastyryldy. Sebebi, byltyrǵy baıqaýdyń tájirıbesin eskere otyryp, konkýrstyń jergilikti jerlerde joǵary deńgeıde ótýine yqpal etetin nusqaýlyqtar, túsindirme jumystaryn qolǵa aldyq",-dep atap ótti L.Súleımen.

Onyń aıtýynsha, bıyl otbasylardyń jarysyna qatysý úshin 2285 januıa ótinish bergen.

"Konkýrstyń óńirlik deńgeılerdegi qorytyndysy baıqaýǵa bıyl 2285 otbasynyń qatysqanyn kórsetti. 2014 jylmen salystyrǵanda, qatysqan otbasylardyń sany 1,7 esege kóbeıdi. 2285 otbasynyń 75 paıyzy, ıaǵnı 1767 otbasy aýyl-aımaqtarda turatyn otbasylar. Bul jerde Soltústik Qazaqstan, Almaty, Ońtústik Qazaqstan, Pavlodar, Jambyl, Qyzylorda, Qostanaı jáne Qaraǵandy oblystarynda turatyn otbasylardyń belsendi bolatynyn atap ótý kerek. Konkýrsqa qatysýshylar arasynda kóp balaly otbasylardyń sany eki esege, jas otbasylardyń sany 1,5 esege artty. Taǵy bir aıta keterlik jańalyq, bıyl baıqaýǵa atalar kásibin jalǵastyrǵan 319 áýlet konkýrsqa qatysýda",-dep tolyqtyrdy L.Súleımen.

Aıta keteıik, "Mereıli otbasy" baıqaýy 12 qyrkúıek kúni Astanada máresine jetedi jáne sol kúni "Qazaqstan" kıno-kontsert zalynda jeńimpazdar marapattalady.