Bıyl menıngokoktan 3 adam kóz jumdy
NUR-SULTAN. QazAqparat - Elimizde qazirgi ýaqytta menıngokokk ınfektsııasyn juqtyrǵan 22 adam em alý ústinde, dep habarlaıdy QazAqparat tilshisi.
«Kóptegen ınfektsııa boıynsha elimizde epıdemıologııalyq jaǵdaı turaqty. Mysaly, jyl basynan beri 4 aıdyń ishinde ınfektsııanyń 10 túri birde-bir márte tirkelgen joq. Atap aıtqanda oba, kúıdirgi, ish súzegi, paratıfter, dıfterııa, polıomıelıt, sirespe, trıhınellez, vıstseraldy leıshmanıoz, qutyrma aýrýy tirkelmedi. 7 ınfektsııa - týlıaremııa, qyzamyq, kene vırýsty entsefalıti, parotıt, bezgek, teri leıshmanıozy, alveokokkoz aýrý jaǵdaıy birli-jarym jaǵdaılary tirkeldi», - dedi QR DSM Qoǵamdyq densaýlyq saqtaý komıtetiniń tóraǵasy Jandarbek Bekshın OKQ-da ótken baspasóz máslıhatynda.
Onyń aıtýynsha, 13 ınfektsııa túriniń deńgeıi tómendegen.
«Alda jaz kele jatyr. Sol sebepti, ishek ınfektsııa aýrýlary - basty másele ekeni sózsiz. Bul ınfektsııalar 19,5 paıyzǵa, salmonellez aýrýlary 30 paıyzǵa, týberkýlez aýrýlary 11 paıyzǵa, tumaý 11 paıyzǵa, jel sheshek 32 paıyzǵa, vırýsty gepatıtter 2,5 esege tómendedi. JRVI 10 paıyzǵa azaıdy. Dese de qazirgi tańda biz menıngokokk ınfektsııasyna mán berip jatyrmyz. Byltyr mamyr men maýsym aıynda osy aýrýdyń órshýi Almaty qalasy men Almaty oblysynda baıqalǵan edi. Byltyrmen salystyrǵanda menıngok aýrýyna shaldyǵý jaǵdaıy 3 esege tómendedi. Búgingi kúni elimizde menıngokokk ınfektsııasynyń 22 jaǵdaıy tirkelip otyr», - deıdi ol.
Bas sanıtardyń aıtýyna qaraǵanda, byltyr menıngokoktan byltyr 12 adam kóz jumǵan. Al jyl basynan beri bul dert úsh adamnyń ómirin jalmap ketken.
«Dúnıejúzilik densaýlyq saqtaý uıymynyń usynysy boıynsha elimizde aldyn alý sharalaryn qolǵa alyp jatyrmyz. Usynystarǵa sáıkes, menıngokoktyń 540 jaǵdaıy tirkelgen kezde aýqymdy aldyn alý jumystary júrgizilýi kerek. Biraq, bizde 22 jaǵdaı ǵana tirkelse de, aldyn alý jumystaryn qolǵa aldyq. Nege deseńiz bul qaýipti aýrý. Byltyr da onyń órshýi Ramazan aıyna dóp kelgen edi. Qazir kóptegen azamattar meshitke barady. Bizdiń usynystarymyz - tumaý belgileri bolsa - úıde qalǵany jón. Sebebi, ınfektsııalyq aýrýlar aýa arqyly da taralady. Al biz ımamdarǵa meshitterdiń ishin jeldetip turý kerektigin eskertemiz», - dedi Jandanbek Bekshın.
