Bıyl memlekettik tapsyrys boıynsha 35 053 bilim berý granttary bólindi - B. Jumaǵulov
ASTANA. 2 tamyz. QazAqparat - Bıyl memlekettik tapsyrys boıynsha 35 053 bilim berý granttary bólindi. Bul týraly búgin Astanada QR Bilim jáne ǵylym mınıstri Baqytjan Jumaǵulov málim etti.
«Bıyl ekonomıkalyq jaǵdaıdy, ındýstrıaldyq-ınnovatsııalyq baǵdarlamany, EKSPO-2017 sharasy men álemdik ýnıversıadanyń bizde ótetinin esepke ala otyryp, memlekettik bilim berý tapsyrysynyń jalpy sany 35053 oryn bolyp otyr. Ol byltyrǵy jylǵa qaraǵanda, 738 grantqa kóp. Bıyl 68742 bala konkýrsqa qatysady, onyń ishinde qazaq tilinde - 51707, orys tilinde - 7035 bala», - dedi B.Jumaǵulov.
Ol granttardyń 12 myńǵa jýyǵy tehnıkalyq ǵylymdar men tehnologııalyq mamandyqtarǵa, 6700-i pedagogıkalyq, 2630 grant aýyl sharýashylyǵy men veterınarııalyq mamandyqtarǵa, bólindi. Sonymen qatar bıyldan bastap dene tárbıesi jáne sport mamandyǵyna tapsyrys 1 myń grantqa deıin ulǵaıtyldy.
Mınıstrdiń aıtýynsha, konkýrsqa qatysýshylardyń arasynda 50997 talapker UBT-nyń, 16072 talapker - keshendi testileýdiń, 1308 talapker - halyqaralyq olımpıadalardyń, 365 talapker - Nazarbaev zııatkerlik mektebiniń sertıfıkatymen qatysýda, sondaı-aq 469 jetim bala, 319 múgedek bala bar. Olardyń bilim granttaryn taǵaıyndaý kezinde basym quqyqtary bar. Konkýrsqa ortasha alǵanda bir grantqa 2,3 bala talasady.
«Bıyl UBT óte joǵary deńgeıde ótti. Keshendi testileý byltyr birinshi ret ótti, bıyl da kolledj bitirgen túlekterdiń kórsetkishteri jaman emes deýge bolady», - dep túıdi sózin vedomstvo basshysy.
Mınıstrliktiń málimetteri boıynsha, bıyl mektepti 143 409 bala aıaqtaǵan. Ulttyq biryńǵaı testileýge 95 455 adam qatysty. Testileýdi 67 990 túlek sátti tapsyrǵan.
