Bıyl memlekettik resýrstar áleýmettik turaqtylyqty saqtaýǵa jumsaldy – Erlan Saırov

NUR-SULTAN. QazAqparat –Saıasatker, qoǵam qaıratkeri Erlan Saırov.2020 jyly elimizde oryn alǵan saıası-qoǵamdyq oqıǵalarǵa qatysty óz pikirin bildirdi, dep habarlaıdy QazAqparat tilshisi.

«2020 jyl Qazaqstan úshin ǵana emes, búkil álem elderi úshin qıyn boldy. Memleket basshysy halyq únine qulaq asý arqyly, memlekettik máselelerdi sheshýge basa nazar aýdardy. Ásirese bıyl naýryz aıynan bastap, pandemııa etek alǵanda búkil memlekettik resýrstar halyqtyń áleýmettik jaǵdaıynyń turaqtylyǵyn saqtap qalýǵa jumsaldy. Osy oraıda Qazaqstandy turaqsyz álemdegi, turaqty memleket dep aıtýǵa ábden negiz bar», - dedi Erlan Saırov.

Sondaı-aq, ol bıyl elimizde oryn alǵan birneshe saıası reformalarǵa toqtalyp ótti.

«Bıylǵy erekshelik memlekettik organdardyń halyqtyń únine qulaq asý qaǵıdasyn ustana bilýi. Sonymen qatar, Eýrazııalyq qaýymdastyqqa kiretin elderdiń táýelsizdigin shekteıtin keıbir faktorlar engizilmekshi boldy. Sol kezde Qazaqstannyń ár el óz táýelsizdigin saqtap qalý tıis degen qaǵıdany ustanýy mańyzdy qadam boldy. Odan bólek, birqatar zańnamalar qabyldandy. Atap aıtsaq, beıbit mıtıng ótkizýge arnalǵan zań jobasy jáne partııa jónindegi zańǵa 30 paıyzdyq kvota engizildi, bul da saıası reforma bolyp esepteledi», - deıdi ol.

Aıta ketsek, búgin elordadaǵy Eýrazııalyq ıntegratsııa ınstıtýtynda «Turaqsyz álemdegi turaqty memleket»: Q.K. Toqaevtyń 2020 jylǵy basty jeti isi» atty baǵdarlamany talqylaýǵa arnalǵan is-shara ótti. Oǵan saıasattanýshylar, qoǵam qaıratkerleri men ǵalymdar qatysty.