Bıyl memleket 320 myńnan astam adamǵa jumysqa ornalasýǵa kómektesedi

ASTANA. QazAqparat - Bıyl jumysqa turý boıynsha memlekettik qoldaý 320 myńnan astam adamdy qamtıdy. Bul týraly búgin Ortalyq kommýnıkatsııalar qyzmetindegi brıfıngte QR Densaýlyq saqtaý jáne áleýmettik damý vıtse-mınıstri Dáýlet Arǵandyqov málim etti.

«2015 jyly jumyspen qamtý sharalarymen 323 myń adamdy nemese jumyssyzdar (458 myń adam) jáne tıimsiz jumyspen qamtylǵandardyń (721 myń adam) jalpy sanynyń 27 paıyzyn qamtý josparlanǵan. Maqsatty toptar boıynsha jumyspen qamtý sharalarymen tıimsiz jumyspen qamtylǵandardyń 12,7 paıyzy jáne jumyssyzdardyń 50,3 paıyzy qamtylady», - dedi vıtse-mınıstr.

Onyń sózine qaraǵanda, qoldaý sharalary memlekettik jáne salalyq baǵdarlamalar aıasyndaǵy («Nurly jol», «Jumyspen qamtý 2020 jol kartasy», Óńirlerdi damytý baǵdarlamasy jáne t.b.) qarastyryldy.