Bıyl memqyzmetterdiń 90 paıyzy elektrondyq formatqa kóshedi – Birjan Nurymbetov

NUR-SULTAN. QazAqparat - 2020 jyldyń sońyna deıin memlekettik qyzmetterdiń 90 paıyzyn elektrondyq formatqa kóshirý josparlanǵan. Bul týraly QR Eńbek jáne halyqty áleýmettik qorǵaý mınıstrliginiń keńeıtilgen alqa otyrysynda vedomstvo basshysy Birjan Nurymbetov aıtty, dep habarlaıdy QazAqparat tilshisi.

Onyń aıtýynsha, búgingi tańda Eńbek mınıstrligi áleýmettik-eńbek salasyndaǵy mańyzdy jobalardy iske asyrady. Birinshisi – «Otbasynyń áleýmettik kartasy». Ol Qazaqstan halqynyń 100 paıyzyn, ıaǵnı 7 mıllıon otbasyn qamtıdy. Áleýmettik karta ár otbasynyń qandaı ómirlik jaǵdaıda ekenin kórsetedi, kúrdeli nemese daǵdarysty jaǵdaıdan shyǵý úshin jumys algorıtmin aıqyndaıdy.

«2019 jyldyń shildesinde áleýmettik kartalar qalyptastyrǵannan keıin kúrdeli jáne daǵdarysty jaǵdaıda bolǵan 101 myń otbasy anyqtaldy. Olarǵa qatysty jumysqa ornalastyrý, emhanalarǵa, balabaqshalar men mektepterge bekitý boıynsha sharalar qabyldandy. Barlyǵy 150 myńnan astam shara júzege asyryldy. Qyrkúıek aıynda 505 otbasy ómirlik qıyn jaǵdaıdan shyǵaryldy. Olarǵa 533 áleýmettik qoldaý sharasy kórsetildi», – dedi Birjan Nurymbetov.

Mınıstr atap ótken ekinshi joba – «Qazaqstan azamatynyń áleýmettik ID» áleýmettik járdemaqy alýdyń ashyqtyǵyn, qolaılylyǵyn arttyrýǵa baǵyttalǵan. Áleýmettik ID AÁK tóleýdi, qoǵamdyq kólikte jeńildikpen jol júrýdi, kópbalaly jáne tabysy az otbasylardyń balalarynyń mektepterde tegin tamaqtanýyn tóleýdi kózdeıdi. Aqtóbe ákimdigimen birlesip ony ilki qoldaný 2019 jyldyń shildesinde bastaldy, operatory «Qazposhta» AQ boldy. 5 myńǵa jýyq karta shyǵarylyp, 31 myń tranzaktsııa júzege asyryldy.

«Joba Qaraǵandy, Atyraý, Pavlodar oblystarynda jáne Nur-Sultan qalasynda engizilýde. 2020 jyly jobany barlyq oblys ortalyqtaryna taratý qajet», – dedi Eńbek mınıstri.

Onyń sózine qaraǵanda jumyspen qamtý jáne jumysqa ornalastyrý salasynda «Elektrondyq eńbek bırjasy» jáne «Elektrondyq eńbek sharttary» jobalary iske asyrylýda. Elektrondy eńbek bırjasynyń arqasynda 2 jyl ishinde 1 mln-nan astam adam jumys taba aldy. «Elektrondyq eńbek sharttary» jobasyna 25 myń uıym qosyldy. 1,1 mln elektrondyq shart tirkelgen, bul qyzmetkerlerdiń eńbek quqyqtaryn qorǵaýǵa yqpal etedi.

«Memlekettik qyzmetterdi avtomattandyrý salasynda elektrondyq qyzmetterdiń úlesi 80 paıyzǵa jetkenin, 2019 jyldyń basynda 42 paıyz bolǵanyn atap ótkim keledi. Egov portalynda 6 memlekettik qyzmetti ornalastyrý jáne 10 qyzmetti proaktıvti formatqa kóshirý esebinen ósimge qol jetkizildi. 2020 jyldyń sońyna deıin biz elektrondyq qyzmetterdiń úlesin 90 paıyzǵa deıin jetkizýdi josparlap otyrmyz», – dep túıindedi Birjan Nurymbetov.