Bıyl mektepterdi jyly dárethanamen tolyq qamtamasyz etýimiz kerek - mınıstr
NUR-SULTAN. QazAqparat - Bıyl elimizdegi barlyq mektep beınebaqylaýmen jáne jyly dárethanamen qamtamasyz etilýi tıis. Bul týraly QR Bilim jáne ǵylym mınıstrliginiń keńeıtilgen alqa otyrysynda vedomstvo basshysy Ashat Aımaǵambetov aıtty, dep habarlaıdy QazAqparat tilshisi.
«Memleket basshysynyń bilim berý uıymdaryn beınebaqylaýmen jáne tıisti jabdyqtarmen qamtamasyz etý týraly tapsyrmasy qazir oryndalyp jatyr. Biraq, desek te búgingi kúni biraz problama bar. Búginde 1 227 mektep jáne 1 628 balabaqsha beınebaqylaý júıesimen jabdyqtalmaǵan. Al jabdyqtalǵan balabaqsha men mektepterdiń sapasyn qaraıtyn bolsaq, bizde biraz suraq bar. Bilim jáne ǵylym, Іshki ister mınıstrlikteri bekitken buıryq bar. Sol buıryqta barlyq másele qarastyrylǵan. Ol vıdeo baqylaý kameralary neshe kún jazý kerek, ol qaı jerde ornalastyrylýy kerek, sapasy qandaı bolýy kerek degen máseleniń barlyǵy jazylǵan. Biraq, búginde óńirler ony oryndamaı otyr. Bul - balalardyń qaýipsizdigine tikeleı baılanysty másele. Sondyqtan, Úkimettiń keńeıtilgen otyrysynda Memleket basshysy taǵy bir márte tapsyrma berdi», - dedi ol
Osy rette mınıstr qyrkúıek aıyna deıin respýblıkadaǵy barlyq mektep pen balabaqshany beınebaqylaýmen qamtamasyz etý kerektigin aıtty.
«Jyly dárethanamen qamtamasyz etý máselesi elimizdegi mektepterdiń úshten birinde problema bolyp tur. Tek dala dárethanasy bar mektepterdiń eń kóbi Túrkistanda - 541, sondaı-aq, Almatyda, Almaty oblysynda, Shyǵys Qazaqstan, Jambyl, Batys Qazaqstan, Aqtóbe, Qaraǵandy jáne Qyzylorda oblystarynda da kóp. Bul máseleni de bıyl tolyq sheshý qajet»,- dedi Ashat Aımaǵambetov.
