Bıyl mektep ǵımaratyn sharlarmen bezendirýge ruqsat etilmeıdi - mınıstrlik

NUR-SULTAN. QazAqparat – QR Oqý-aǵartý mınıstrliginiń baspasóz qyzmeti 1 qyrkúıek kúni ótetin alǵashqy qońyraý sharasyn uıymdastyrýdyń tártibi týraly túsindirme taratty, dep habarlaıdy QazAqparat tilshisi.

«Qyrkúıektiń birinshi kúni bilim berý uıymdarynda bilim kúnine arnalǵan saltanatty jıyn ótedi.

Óńirlik bilim basqarmalary jańa 2022-2023 oqý jylyn jarııalaıtyn is-sharanyń joǵary ıdeıalyq-qundylyq mazmunyn qamtamasyz etý maqsatynda qajetti is-qımyldardy úılestiredi», -dep jazylǵan málimette.

Sondaı-aq saltanatty jıyn ótkizý kezinde birqatar merekelik rásim ótkizýge ruqsat etilmeıtini aıtylǵan.

«Saltanatty jıyndy ótkizý túrin, qatysýshylar quramyn bilim berý uıymdary derbes aıqyndaıdy. Anımatorlardy, merekelik agenttikterdi, ártisterdi, merekelik is-sharalardy ótkizý úshin aqyly jeke stýdııalardy tartýǵa; merekelik dastarhandar jaıýǵa; mektep ǵımaraty men aýmaǵyn sharlarmen bezendirýge ruqsat etilmeıdi.

Memlekettik týdy alyp shyǵý jáne gımndi oryndaý Qazaqstan Respýblıkasynyń memlekettik rámizderin paıdalaný tártibine sáıkes júrgiziledi», - dep jazady vedomstvonyń baspasóz qyzmeti.

Mınıstrlik BAQ-ta taraǵan keıbir málimetter týraly da túsinikteme berdi.

«Balalarǵa ekologııalyq tárbıe berý, qorshaǵan ortany lastamaý, tabıǵat pen janýarlarǵa qamqor bolý maqsatynda saltanatty jıyn kezinde sharlar men kógershinderdi paıdalaný usynylmaıdy», - dep jazylǵan resmı málimette.

Buǵan deıin Y.Altynsarın atyndaǵy Ulttyq bilim akademııasy 2022-2023 jylǵy oqý jylynda bilim berý úrdisin uıymdastyrý tártibin belgileıtin ádistemelik-nusqaý hattyń mátinin jarııalaǵan bolatyn. Atalǵan qujatta mektepishindegisaltanatty jıyndarǵa shar menkórershin ushyrý sııaqty atrıbýtıkalardy qoldanbaý usynylǵan.