Bıyl medıtsına salasynda biregeı tehnologııalar engiziledi - Alekseı Tsoı

NUR-SULTAN. QazAqparat - Búgin halyq aldynda esep berý kezdesýinde QR Densaýlyq saqtaý mınıstri Alekseı Tsoı bıyl medıtsına salasyndaǵy engiziletin biregeı tehnologııalardy atady, dep habarlaıdy QazAqparat tilshisi.

«Densaýlyq saqtaý júıesiniń mamandary jańa medıtsınalyq tehnologııalardy izdestirý men engizýdi turaqty negizde júrgizedi. Qazaqstanda medıtsınanyń birqatar baǵyty halyqaralyq deńgeıde tabysty básekelese bastady. Bizdiń elimizde joǵary tehnologııalyq medıtsınalyq kómektiń (JTMK) 78 túri boıynsha halyqqa qoljetimdilik qamtamasyz etilgen. Bul rette, 2020 jyly 10 myńǵa jýyq JTMK qyzmeti kórsetildi», - dedi A. Tsoı Ortalyq kommýnıkatsııalar qyzmetinde.

Onyń aıtýynsha, 2011 jyldan bastap elimizde organdardy transplantatsııalaý tehnologııalary belsendi engizilýde. 2020 jyly 112 transplanttaý jasaldy.

2020 jyly mynadaı biregeı tehnologııalar engizildi:

- 3D basyp shyǵarý tehnologııasy boıynsha jeke úlgilengen jasandy omyrtqaly protezdi ornatý;

- bas súıek nervteriniń mıkrovaskýlıarlyq dekompressııasy kezindegi endoskopııalyq assıstentsııa.

«2021 jyly biz kelesi tehnologııalardy ıgerýdi jáne engizýdi josparlap otyrmyz: gamma-pyshaq apparatyn qoldanýmen ortalyq júıeke júıesi aýrýlaryn emdeýdiń radıohırýrgııalyq ádisi, júrekishilik stımýlıatordy transkateterlik ımplanttaý. Sonymen qatar, Semeı qalasynda ıAdrolyq medıtsına ortalyǵynyń qurylysy aıaqtaldy. Ortalyqtyń tolyq qyzmet spektri aǵymdaǵy jyldyń maýsym aıynan bastap kórsetiletin bolady. Munymen qosa, Nazarbaev Ýnıversıteti janynan Balalar kardıohırýrgııalyq ortalyǵyn ashý josparlanýda», - dedi mınıstr.