Bıyl Maraldy kóline 50 myńǵa jýyq týrıst kelgen
Bul týraly óńirlik kommýnıkatsııalar qyzmetinde ótken bapsasóz jıynynda Sharbaqty aýdanynyń ákimi Ázilhan Ábeýov málim etti.
«Bıyl Maraldy kóliniń jaǵasynda 50 myńǵa jýyq adam demaldy, - dedi Ázilhan Ábeýov. – Bul kórsetkish ótken jylǵydan tómen. Ol aýa raıymen baılanysty dep oılaımyz. Biz oblys ákiminiń tapsyrmasymen Maraldy tuzdy kóli jáne «Shaldaı» kýrorttyq aýmaǵyna qatysty týrızmdi damytýdyń 3 jyldyq josparyn jasap qoıdyq. Jospar boıynsha, Maraldy kóline keletin týrısterdiń sanyn 2023 jylǵa deıin 150 myńǵa jetkizbekpiz».
Eske salaıyq, Maraldy kóline 2018 jyly 60 myń adam kelgen bolatyn. Al, 2017 jyly 35 myń týrıst demalǵan. Spıkerdiń aıtýynsha, Maraldy kólindegi demalys ornyn damytý úshin bıyl ınvestor 150 mln teńge jumsaǵan.
«Kýrort Maraldy» JShS kóldegi týrızmdi damtyýmen jumys jasaıdy. Bıyl ınvestor qomaqty qarjysyn quıdy. 3 jańa dámhana salyndy. Aldaǵy ýaqytta quzyrly basqarma arqyly tuşy kóldi de jeke ıelikke berip, onda balyq aýlaýdy damytpaqpyz», - dedi aýdan ákimi.
Ázilhan Ábeýovtiń aıtýynsha, kólge jaqyn Kólbulaq aýylynyń turǵyndary da demalýǵa kelgen adamdarǵa úıin jalǵa berip, paıda taba bastaǵan.
«Sonymen qatar, jospar boıynsha «Qazavtojolmen» kelisip qoıdyq. Maraldy stantsııasynyń mańyndaǵy respýblıkalyq joldyń bóligi jóndeledi. Jol jaryqtandyrylyp, elektr júıesi men sý tartyp, jol boıyndaǵy servısti damytpaqpyz», - dedi Ázilhan Ábeýov.
