Bıyl Mańǵystaýǵa 220 myń týrıst kelgen
AQTAÝ. QazAqparat - Mańǵystaý oblysyna keletin týrısterdiń sany jyl saıyn artyp keledi. Aımaqqa bıyl 220 myń saıahatshy kelgen, dep habarlaıdy QazAqparat tilshisi.
Bul týraly óńirlik kommýnıkatsııalar qyzmeti alańynda suhbat bergen Mańǵystaý oblystyq týrızm basqarmasynyń basshysy Órken Bısaqaev málimdedi. Onyń aıtýynsha, 2017 jyly Mańǵystaý oblysyna 205 904 týrıst kelgen. Bul 2016 jylǵa qaraǵanda 7 paıyzǵa kóp. 205 904 saıahatshynyń 177 178-i - el azamattary. 28 726 adam shetelden kelgen. Al bıyl týrıster sany 220 myń boldy.
Vedomstvo basshysynyń sózinshe, 2020 jylǵa deıin aımaqqa at basyn tireıtin qonaqtardyń sany 400 myńǵa deıin ósedi, al 2025 jylǵa qaraı bul kórsetkish 700 myńnan asatyn bolady.
«Osyǵan baılanysty 7-8 myń oryndyq qonaq úıler salynady. Qazirgi tańda oblysta 82 qonaqúı bar, onyń ishinde «3-4-5 juldyzdy» 16 qonaq úı jumys istep tur»,-dedi Ó.Bısaqaev.
Qonaq úıler men basqa da týrıstik nysandardyń qurylysyna qajetti ınvestıtsııany qamtamasyz úshin 5 jylǵa arnalǵan jospar qurylyp jatyr. Jergilikti bılik Kaspıı jaǵalaýy boıymen Aqtaý qalasynan Quryq portyna deıin jaǵajaı týrızmin damytpaqshy. Aýmaqtyń uzyndyǵy - 63 shaqyrym. Jasalyp jatqan týrızmdi damytý memlekettik baǵdarlamasyna jetispeıtin elektr qýatymen, sýmen, gazben qamtý, sonymen qatar qoldanystaǵy joldy tórt jolaqqa deıin keńeıtý qurylystary boıynsha jobalar engizildi. Bul jumystarǵa respýblıkalyq bıýdjetten 2019-2020 jyldarǵa 27 mıllıard teńge qarajat baǵyttaý josparlanyp otyr.
