Bıyl maqtanyń baǵasy qansha bolady
ShYMKENT. QazAqparat - Ońtústik Qazaqstan oblysynda maqta baǵasy tonnasyna 160 myń teńge bolyp belgilendi. Maqtaral aýdanyndaǵy «Qazaqstan» maqta qabyldaý pýnkti alǵashqy maqta baǵasyn shyǵardy, dep habarlaıdy QazAqparat HAA tilshisi aýdan ákimdiginiń baspasóz qyzmetine silteme jasap.
Bıyl Myrzashóldegi aq altynnyń túsimi gektaryna 25-30 tsentnerge jetken. Aq, daıyn ónimniń tonnasy 160 myń teńgeden qabyldanyp jatyr. Eger sharýalar maqta baǵasy taǵy da qymbattaýy múmkin dep dep saqtaýǵa qoıatyn bolsa, olarǵa qazirshe tonnasyna 150 myń teńgeden avans berilmek eken.
Kórshiles Shardara aýdany, Alataý batyr aýylyndaǵy «Qazaqstan» maqta qabyldaý pýnkti búgingi tańda 200 tonna maqta jınap úlgerdi. 250-ge jýyq sharýa qojalyqpen kelisim-shartqa otyrǵan maqta qabyldaýshylar bıylǵy jyly qyrmanǵa 15 myń tonnaǵa deıin ónim jınaýdy josparlap otyr.
Aıta keteıik, dúnıejúzi boıynsha maqta ósirýmen 39, al maqta talshyǵyn bastapqy jáne tereń óńdeýmen 80 astam memleket aınalysady. Qazirgi ýaqytta Qazaqstanda shamamen 100 myń tonna maqta talshyǵy óndirilip, onyń 95%-y eksporttalǵan.
Sol sııaqty, ótken jyly sharýalar 214 myń tonna «aq altynnyń» 45paıyzyn kombaındarnyń kómegimen jınaǵan. Bul kórsetkishti bıylǵy jyly 60 paıyzǵa jetkizbek. Osyǵan oraı,bıyl 23 sheteldik maqta kombaıny satyp alyndy. Endigi kezekte dıhandar ala jazdaı eńbek etip, mańdaı termen ekken maqtany jaýyn-shashynǵa qaldyrmaı ysyrapsyz jınap alýdy josparlap otyr.
