Bıyl magıstratýra, doktorantýra granttarynyń quny artady

ASTANA. QazAqparat – Magıstratýra, doktorantýra granttarynyń quny keminde bakalavr granttarynyń qunymen teńesýi kerek. Ǵylym jáne joǵary bilim mınıstri Saıasat Nurbek Úkimet otyrysynan keıin BAQ ókilderine osyndaı josparyn jarııalady, dep habarlaıdy QazAqparat.

«Bizde joǵary oqý oryndarynyń basym kópshiligi áli zertteý formatyna kóshken joq. Birneshe sebep bar. Birinshisi – joǵary oqý oryndarynyń rektorlarynyń ózderi magıstrlardy, PhD doktoranttaryn daıarlaýǵa asa yntaly emes. Nege deseńiz, magıstr grantynyń quny 380 myń teńge. Al bakalavrıat grantynyń quny 1 mln teńgege jýyq», - dedi ol.

Mınıstrdiń sózine qaraǵanda, aldaǵy 3 jylda magıstratýra, doktorantýra granttarynyń quny 1,5-2 mln teńgege deıin kóteriledi.

«Sonda bylaı qarasańyz, rektor bylaı oılaıdy: «Men bakalavrdy qazir qabyldasam, onda ol tórt jylda maǵan 4 mln teńge ákeledi. Al magıstrdy qabyldasam, ol eki jylda maǵan bir mln da ákelmeıdi», - degendeı.

Sondyqtan biz osy jyldan bastap biz magıstratýra, doktorantýra granttarynyń qunyn ósiremiz. Keminde bakalavrlarmen teńesý kerek. Biraq negizinde osy úsh jyldyń ishinde olar 1,5-2 mln teńge kóleminde bolady», - dedi Saıasat Nurbek.