Bıyl «Mádenı mura» baǵdarlamasynyń basty qorytyndylary Elbasynyń qatysýymen Qoǵamdyq keńes otyrysynda talqylanady

Bul týraly búgin Úkimet otyrysynda QR Mádenıet mınıstri Muhtar Qul-Muhammed málim etti.

«Mádenı mura» baǵdarlamasynyń basty qorytyndylary Memleket basshysynyń qatysýymen ústimizdegi jyldyń jeltoqsanynda ótetin Qoǵamdyq keńestik keńeıtilgen otyrysynda talqylanatyn bolady. Onda úsh mınıstrliktiń basshylary tıisti baıandamasyn jasaıdy», - dedi vedomstvo basshysy.

Aıta keteıik, 2004 jyly Elbasynyń bastamasymen qabyldanǵan «Mádenı mura» baǵdarlamasy tarıhı-mádenı muranyń úlken bir bóligin júıege keltirip, ony aınalymǵa túsirýge múmkindik berdi. Osy kezeń ishinde 40 arheologııalyq jáne 26 ǵylymı-qoldanbaly zertteý júrgizildi. Olardyń barlyǵy ǵylymǵa myńnan astam artefaktiler berdi. «Mádenı mura» aıasynda Qytaı, Túrkııa, Mońǵolııa, Reseı, Japonııa, Mysyr, AQSh jáne Batys Eýropa elderine jasalǵan ǵylymı-izdestirý ekspedıtsııalarynyń nátıjesinde elimizge qazaq halqynyń 5 myńnan astam tarıhyna, etnografııasyna, ónerine qatysty asa qundy muraǵat qujattary qaıtaryldy.

Tarıhymyzǵa jáne mádenıetimizge asa mańyzdy 73 eskertkish qaıta qalpyna keltirildi.