Bıyl Lısakov qalasynda - «jol jóndeý jyly»
QOSTANAI. QazAqparat - 2017 jyly Lısakov qalasynyń áleýmettik-ekonomıkalyq kórsetkishteri artqan. Bul týraly qala ákimi Almat Ysmaǵulov málim etti, dep habarlaıdy QazAqparat tilshisi.
Almat Ysmaǵulovtyń aıtýynsha, bıyl óńirde «jol jóndeý jyly» boldy. Osy ýaqytqa deıin qala turǵyndary jol máselesi týraly ákimniń atyna birneshe márte hat jazyp kelgen edi.
«Qala ishindegi jol 81 shaqyrymdy quraıdy. Jyl basynda jol aýmaǵynyń 44 %-na sapaly jóndeý qajettiligi týyndady. Sóıtip, bıyl 600 mln teńgeden astam qarajat jol máselesin sheshýge jumsalýda. Oǵan qosa úsh kósheniń boıyna ortasha jóndeý júrgizildi. Sondaı-aq, Temirbaev kóshesi tolyqtaı qaıta jańa keıipke enedi. Buǵan 268 mln teńge bólip otyrmyz. 17 myń sharshy metr aýmaqty trotýar ornatyldy. Osy qarqyndy saqtasaq, aldaǵy eki jylda qala ishindegi joldar durystalady», - dedi Lısakov qalasy ákimi.
Al negizgi ekonomıkalyq kórsetkishter boıynsha irkilis joq. Qalanyń ónerkásiptik óndiris qurylymynyń 63 %-y iri kásiporyndarǵa, 37%-y shaǵyn jáne orta bızneske tıesili. Taý-ken ónerkásibinde ónim 22,5 mlrd teńgege jetken. Bul 2016 jylmen salystyrǵanda 18,2 % - ǵa ósken.
Jalpy, Lısakovta ónerkásiptik kásiporyndary 28 mlrd teńgeniń ónimderin óndirgen. Bul byltyrǵy jylǵa qaraǵanda 118 %-ǵa artyq.
«Qalanyń oblystaǵy ónerkásip óndirisiniń úlesi 6% jýyqtady. Sońǵy 4 jyl ishinde ónerkásiptik ónim kóleminiń úlesi artty. Munymen birge, «Shaımerden» aktsıonerlik qoǵamy kórsetilgen kómektiń arqasynda turǵyndar kópten kútken fýtbol alańy ashyldy», - dedi qala ákimi.
