Bıyl L. N. Gýmılev atyndaǵy Eýrazııa ulttyq ýnıversıtetine 350-ge jýyq «Altyn belgi» ıegeri oqýǵa tústi
ASTANA. 2 qyrkúıek. QazAqparat - Búgin L. N. Gýmılev atyndaǵy Eýrazııa ulttyq ýnıversıtetinde Bilim kúnine arnalǵan saltanatty jıyn ótti. Mádenı shara barysynda Lev Gýmılev atyndaǵy Eýrazııa ulttyq ýnıversıtetiniń rektory E.Sydyqov ýnıversıtettiń oqytýshy-professorlary men stýdentterin quttyqtap, jańa oqý jylyna tolaǵaı tabystar tiledi.
Osy jıynnan keıin Eýrazııa ulttyq ýnıversıtetiniń «Dala sazy» halyqtyq aspaptar orkestriniń dombyrashylar ansambli men oqý ornynyń basqa da talanttary óner kórsetip, «Biz- birgemiz!» atty stýdentter flesh-moby uıymdastyryldy.
Bilim berý sapasyn qamtamasyz etý jónindegi táýelsiz qazaqstandyq agenttiginiń ulttyq reıtıngisi boıynsha 1 oryndy eki jyl qatarynan ıelengen Lev Gýmılev atyndaǵy Eýrazııa ulttyq ýnıversıtetindegi 66 mamandyq boıynsha bilim alýǵa bıyl 4000 myńǵa jýyq stýdent tústi. «Grant ıegerleriniń sany - 3067, onyń ishinde 344-i - «Altyn belgi» ıegerleri, sondaı-aq 251 halyqaralyq jáne respýblıkalyq ǵylymı jáne túrli pánder olımpıadalarynyń jeńimpazdary, 12 halyqaralyq sport jarystarynyń jeńimpazdary bar. Aǵymdaǵy jyly stýdentter qataryna jeńildikpen qabyldanǵan 6 múgedektiń, 9 jetim balanyń, 49 oralman qandastarymyzdyń bar ekenin aıta ketken jón», - delingen EUÝ baspasóz qyzmetiniń málimetinde.
