Bıyl Qyzylordada orman ósirý kólemin ulǵaıtý jospary bekitildi
NUR-SULTAN. QazAqparat – Keler jyldary teńizdiń qurǵaǵan ultanynda 213,1 myń gektar jerge 177,5 mln aǵash egý josparlanǵan. Bul týraly Úkimet otyrysynda Qyzylorda oblysynyń ákimi Gúlshara Ábdiqalyqova aıtty, dep habarlaıdy QazAqparat tlshisi.
«Qyzylorda óńirinde ekologııa – asa ózekti másele. Bul másele Aral teńiziniń qurǵaý saldarymen baılanysty. Búginde Aral teńiziniń qurǵaǵan ultanynyń jalpy kólemi 6 mln gektardy qurasa, onyń 2,5 mln gektary Qazaqstan aýmaǵyna tıesili. Ekologııalyq jaǵdaıdy jaqsartý maqsatynda sońǵy 29 jylda teńiz ultanynyń qazaqstandyq bóliginde 194 myń gektar sekseýil jáne basqa da gallaktıvti ósimdikter kóshetterin egý jumystary júrgizildi. Bul kóshetter qazirgi ýaqytta tabıǵı túrde ósip, kóbeıýde», - deıdi Qyzylorda oblysynyń ákimi Gúlshara Ábdiqalyqova.
Onyń aıtýynsha, Qyzylordadaǵy ormandardy molyqtyrý jáne orman ósirý kólemin ulǵaıtýdyń qadamdyq jospary bıyl qarasha aıynda bekitildi.
«Osy josparǵa sáıkes, keler jyldary teńizdiń qurǵaǵan ultanynda 213,1 myń gektar jerge 177,5 mln aǵash egýdi josparlap otyrmyz. Sondaı-aq, orman molyqtyrý jumystaryna jáne eldi mekenderge qajetti aǵash egý maqsatynda orman tuqym baqtarynyń kólemi 100 gektarǵa ulǵaıtylady.bul jumystarǵa aldaǵy 5 jylda oblystyq bıýdjetterden 1,1 mlrd teńge qarjy qaralady. Degenmen, qazirgi tańda aımaqtaǵy orman sharýashylyǵy mekemeleriniń materıaldyq tehnıkalyq bazasy tómen ekenin aıta ketý kerek. Sonymen qatar, qajetti tehnıka men qural-jabdyqtar satyp alýǵa biz qosymsha respýblıkalyq bıýdjetke 1,8 mlrd teńge qarjy bólý týraly bıýdjettik ótinim joldadyq», - deıdi ol.
