Bıyl Qyzylorda oblysynda 26 eldi mekenniń 114 kóshesi jóndeýden ótkiziledi
QYZYLORDA. 20 mamyr. QazAqparat /Jańagúl Serdaly/ - Bıyl Qyzylorda oblysynda 26 eldi mekendegi 114 kóshe jóndeýden ótkiziledi. Bul týraly ákimdik májilisinde aıtyldy.
Memleket basshysynyń tapsyrmasymen daǵdarys kezeńine qaramastan qolǵa alynǵan «Batys Eýropa-Batys Qytaı» kólik dálizi megajobasy Syr eliniń ekonomıkasyn kóterýde jáne ındýstrııalandyrýda eń úlken qozǵaýshy kúsh bolyp otyr. «Joba múmkindigin paıdalana otyryp, bıyl 26 eldi mekendegi 114 kósheni jóndeýden ótkizemiz. Bul maqsatqa 1 mlrd. teńge bólindi. 2012 jyly bul jumystardy ári qaraı jalǵastyra otyryp, qarjyny 2 mlrd. teńgege jetkizetin bolamyz», - dedi májiliste aımaq basshysy.
