Bıyl Qyzylorda kúni erte atalyp ótiledi
ASTANA. QazAqparat - Bıyl Qyzylorda kúni erte atalyp ótiledi. Bul týraly búgin qala ákiminiń orynbasary Nurhan Jalıev málimdedi. Qala kúnin toılaý qyrkúıek aıynyń 23-24 juldyzyna josparlanǵan.
Ákim orynbasarynyń aıtýynsha, merekelik is-sharalar Syr jurshylyǵynyń jáne qala qonaqtarynyń kóńilinen shyǵatyndaı, dep jazady kyzylorda-news.kz.
Sonymen, ádettegideı qala kúni qarsańynda birneshe áleýmettik nysandar iske qosylady. 23-qyrkúıekte jastar arasynda fýtboldan ótetin týrnır qortyndylanady. 24-i kúni ótetin negizgi merekelik sharalar eki bólimnen turmaq. Birinshi bóliminde qala jurshylyǵy «Syr súleıleri» alleıasy boıynda ótetin qolóner sheberleriniń kórmesin tamashalaı alady. Osy jerde ulttyq taǵamdar daıyndaýdan baıqaý jáne shubat festıvali uıymdastyrylmaq.
Merekelik keshtiń ekinshi bólimi ortalyq alańda jalǵasady. Dástúr boıynsha munda sporttyq jarystar, qala tarıhynan syr shertetin retro-kórme, batpyraýyq festıvali ótedi. Qala kórkine kórik qosqan jańa sýburqaqtyń ashylýy da dál osy kúnge josparlanǵan.
Kishkentaı qyzylordalyqtar úshin teatrlanǵan «Ertegiler elinde» kórinisi, balalar alańy jáne velosıpedpen jarysý oıyndary ótkizilý josparlanýda.
Mereke gala-kontsertke ulasyp, merekelik otshashýmen qortyndylanbaq.
Eske sala ketsek, qala tarıhy Aqmeshit dep atalǵan kezeńnen bastalady, ol 1820 jyly Qoqan handyǵy kezinde Syrdarııa boıynda alǵash qorǵan retinde salynǵan.
