Bıyl Qyzylorda qalasynda Temirbek Júrgenovtiń eskertkishi boı kóteredi

ASTANA. QazAqparat – Bıyl Qazaqstandaǵy mádenıet, ádebıet salasynyń talantty uıymdastyrýshylarynyń biri, kórnekti memleket jáne qoǵam qaıratkeri Temirbek Júrgenovtiń týǵanyna 125 jyl tolady. Tarıhı tulǵanyń mereıtoıyn atap ótý maqsatynda Úkimet jalpyrespýblıkalyq josparyn jarııalady, dep habarlaıdy QazAqparat tilshisi.

«Temirbek Júrgenovtiń týǵanyna 125 jyl tolýyna daıyndyq jáne ótkizý jónindegi jalpyrespýblıkalyq jospary bekitilsin. Jarty jyldyń qorytyndysy boıynsha 2023 jylǵy 20 maýsymnan jáne 20 jeltoqsannan keshiktirmeı QR Mádenıet jáne sport mınıstrligine jalpyrespýblıkalyq jospardyń iske asyrylý barysy týraly aqparat usynsyn. Mınıstrlik 2023 jylǵy 25 jeltoqsannan keshiktirmeı QR Úkimetiniń Apparatyna jalpyrespýblıkalyq jospardyń iske asyrylý barysy týraly jıyntyq aqparat usynsyn», - delingen Mádenıet jáne sport mınıstrliginiń resmı saıtynda jarııalanǵan Úkimet qaýlysynda.

Joǵaryda kórsetilgen josparǵa saı, jyl sońyna deıin el boıynsha 80-ge jýyq mádenı is-shara men ǵylymı konferentsııalar ótedi. Buǵan qosa, otandyq telearnalardan tulǵanyń ómiri men eńbegine arnalǵan derekti fılmder kórsetip, basylymdarda maqalalar jarııalaý josparǵan.

Sonymen qatar, qujatta kórsetilgendeı, bıyl qarashada Qyzylorda qalasynda Temirbek Júrgenovtiń eskertkishin ornatylmaq. Oǵan 98 mln teńge bólinbek.

Ótkiziletin is-sharalardyń josparyn myna silteme boıynsha ótip, kórýge bolady.

Eske sala keteıik, 2023 jyl - túrki áleminde Temirbek Júrgenov jyly bolyp jarııalanǵan bolatyn.