Bıyl Qytaıdyń qorǵanysqa jumsaıtyn shyǵyny 200 mlrd dollardan asady

BEIJІŃ. QazAqparat – Qytaı bıligi 2021 jyly ulttyq qorǵanysqa jumsalatyn shyǵyndy 6,8%-ǵa, ıaǵnı 1,355 trln ıýanǵa deıin (shamamen 209 mlrd jollar) arttyrýdy josparlap otyr. Bul týraly bıylǵy jylǵa arnalǵan ortalyq jáne jergilikti bıýdjet baıandamasynyń jobasynda aıtylǵan, dep habarlaıdy QazAqparattyń menshikti tilshisi.

«Ulttyq qorǵanysqa jumsalatyn shyǵyn 1,355 trıllıon ıýanǵa jetip, 6,8%-ǵa ósedi», -delingen baıandamada.

Eske sala keteıik, 2020 jyly QHR-dyń qorǵanys bıýdjeti 6,6%-ǵa (1,26 trln ıýanǵa deıin), al 2019 jyly 7,5%-ǵa (1,19 trln ıýanǵa deıin) ulǵaıǵan bolatyn.

Bul rette 2021 jyly syrtqy saıası qyzmetke jumsalatyn shyǵyndar 1,9% -ǵa, ıaǵnı 50,414 mıllıard ıýanǵa (shamamen 7,76 mıllıard dollar) deıin azaıady, al qoǵamdyq qaýipsizdikti qamtamasyz etýge arnalǵan shyǵyndar 0,7% -ǵa, ıaǵnı 185,092 mıllıard ıýanǵa (shamamen 28,5 mıllıard dollar) deıin ósedi.

Jalpy alǵanda, ortalyq bıýdjettiń jeke shyǵyndary 3,5 trln ıýandy (shamamen 539 mlrd dollar) quraıdy, bul kórsetkish ekinshi jyl qatarynan 0,2%-ǵa tómendegen.

Buǵan deıin Beıjińde 13-shi saılanǵan Búkilqytaılyq Halyq Ókilderi Jınalysynyń (BHÓJ, parlament) tórtinshi sessııasy ashylǵany habarlanǵan bolatyn.