Bıyl qysta 24 adam muz astyna ketip, kóz jumdy - TJK
ASTANA. QazAqparat - Qysta Qazaqstanda sýda jáne muzda 6o-tan astam adam zardap shekti. Bul týraly búgin Astanada ótken baspasóz máslıhatynda QR ІІM Tótenshe jaǵdaılar komıtetiniń resmı ókili Rýslan Imanqulov málim etti.
«Qys kezeńinde sýda jáne muzda 64 adam zardap shekti, sonyń ishinde 24 adam kóz jumdy. OQO-da - 5, Jambyl oblysynda - 4, Atyraý oblysynda - 4 adam qaza boldy. Ótken jylmen salystyrǵanda qys kezeńinde sýda jáne muzda kóz jumǵandardyń sany 20 paıyzǵa óskenin atap ótken jón. Qys kezeńi áli aıaqtalǵan joq, sondyqtan muz ústindegi qaýipsizdik qaǵıdalaryn múltiksiz saqtaý qajettigi týraly eske salamyz», - dep toqtaldy resmı ókil.
Onyń sózine qaraǵanda, muzdaǵy qaýipsizdik qaǵıdalary boıynsha aldyn alý jumystary jalǵasýda.
«Ótken aptada Qaraǵandy oblysynyń aýmaǵyna áýeden barlaý jumystaryn júrgizý kezinde muz ústinde balyq aýlap otyrǵan balyqshylardy kórdik. Olar keı jaǵdaılarda qarapaıym qaýipsizdik qaǵıdalaryn saqtamaıdy. Kóbinese, adamdar muzdyń ústine kólikpen shyǵady. Osyndaı jaǵdaılar basqa oblystarda da boldy», - dedi R. Imanqulov.
