Bıyl qyrkúıektiń 1-inen bastap Astana mektepteriniń 1-4 synyptarynda oqıtyn oqýshylar tegin ystyq tamaqpen qamtamasyz etiledi
ASTANA. Qyrkúıektiń 1-i. QazAqparat /Gúlmıra Álıakparova/ -Aǵymdaǵy jylǵy qyrkúıek aıynyń 1-inen bastap Astana qalasyndaǵy jalpy bilim beretin mekemelerdiń 1-4-shi synyptarynda oqıtyn oqýshylar bıýdjet esebinen tegin ystyq tamaqpen qamtamasyz etiletin bolady.
Qala ákimdiginen málim etkendeı, tegin ystyq tamaqpen 30 myńǵa jýyq bala qamtylmaq.
Aıta keteıik, bıyl elordanyń mektep tabaldyryqtaryn alǵash ret 6449 búldirshin attady, olardyń byltyrǵy sany - 7436 boldy.
2009-2010 oqý jylynyń sońynda bilim berý salasynda jumys isteıtin pedagogtardyń sany 8282-ni qurady.
Sondaı-aq, Astana qalasynda bilim berý salasyn qarjylandyrý jyldan jylǵa artyp kele jatqanyn atap ótken jón. Máselen, 1998 jyly bul salaǵa 2 mıllıard teńge bólingen bolsa, aǵymdaǵy jyly qarjylandyrý - 11 mıllıard teńgeni qurady.
Bıylǵy oqý jylynyń baǵdarlamasyndaǵy jańashyldyq - «Ózin-ózi taný» mindetti pániniń engizilýi. Pán aptasyna bir ret ótkiziletin bolady. Búgingi kúni barlyq bilim berý mekemeleri atalmysh pán boıynsha úıretý-ádistemelik keshendermen tolyǵymen qamtamasyz etildi.
