Bıyl kúzgi jıyn-terin jumystaryna 423 myń tonna dızel otyny bólindi - Bolat Aqsholaqov

KÓKShETAÝ. QazAqparat - Elimizdiń aýyl sharýashylyǵy taýaryn óndirýshilerine kúzgi jıyn-terin jumystaryn júrgizý úshin 423 myń tonnadan astam dızel otyny bólindi, onyń 83 myń tonnasy Aqmola oblysynyń úlesinde. Bul týraly Aqmola oblysyna jumys sapary barysynda turǵyndarmen kezdesken QR Energetıka mınıstri Bolat Aqsholaqov málim etti, dep habarlaıdy QazAqparat tilshisi.

Mınıstrdiń sózinshe, aǵymdaǵy sátte dızel otynyn aýyl sharýashylyǵy taýaryn óndirýshilerine tıep-jóneltý jumysy kestege saı júzege asyrylatyn bolady.

«Búgingi kúni kúzgi jıyn-terin jumystaryn ýaqtyly jáne turaqty júrgizý úshin elimizdegi aýyl sharýashylyǵy taýaryn óndirýshilerdiń atyna munaı óńdeý zaýyttarynda 1 tonnasy úshin 222 myń teńge (184 teńge/lıtr) baǵasy boıynsha 423 myń tonnadan astam dızel otyny bólindi, bul óńirge baılanysty bólshek saýda baǵasynan orta eseppen 15-25 paıyzǵa tómen. Onyń ishinde 83 myń tonnasy Aqmola oblysynyń úlesinde nemese el boıynsha barlyq kólemniń 5-shi bóligi qarastyrylyp otyr», - dedi Bolat Aqsholaqov.

Sonymen qatar, mınıstr aýyl sharýashylyǵy taýaryn óndirýshiler úshin dızel otynyn jetkizý naryǵyn reformalaý boıynsha baılanys derekterin, egistik jerlerdiń jalpy alańyn, janar-jaǵarmaı materıaldarǵa degen qajettiligin kórsete otyryp, aýmaqtyq bóliniste aýyl sharýashylyǵy taýaryn óndirýshilerdiń derekter bazasyn qurý, otyn taratý úshin elektrondyq-aqparattyq júıeni engizý sııaqty birqatar sharalar qarastyrylyp otyrǵanyn atap ótti. Bul óz kezeginde aýyl sharýashylyǵy taýaryn óndirýshilerge munaı bazalarynan nemese resýrs ustaýshylardan munaı ónimderin óz betinshe satyp alýǵa múmkindik beredi.

Aıta ketsek, budan buryn arzandatylǵan dızel boıynsha oblys ákimdikterinde jaýapty tulǵalar belgilengen edi.