Bıyl kúzde tuńǵysh ret jasóspirimder arasynda «Qazaqstan barysy» týrnıri ótedi
ASTANA.QazAqparat - Bıyl kúzde tuńǵysh ret jasóspirimder arasynda «Qazaqstan barysy» týrnıri ótedi. Bul týraly búgin QazAqparat tilshisine 2014 jylǵy Qazaqstan barysy - Muhıt Tursynov aıtty.
«Bıyl kúzde, shamamen qazan aıynda tuńǵysh ret jasóspirimder arasynda «Qazaqstan barysy» týrnıri ótedi. Oǵan elimizdiń túkpir-túkpirindegi jas balýandar qatysa alady. Bul qazirgi jastar úshin óte mańyzdy shara dep oılaımyn, óıtkeni qazaq kúresi búginde qarqyndy damyp keledi. Sondaı-aq, «Qazaqstan barysy» týrnıri jastardyń sport jolyndaǵy áleýmettik baspaldaǵy dep aıtýǵa bolady. Men elimizdegi barlyq ata-analardan balalarynyń, ásirese uldarynyń densaýlyǵy myqty bolyp ósýin qadaǵalaýyn suraımyn. Óıtkeni olar bizdiń Otanymyzdyń erteńgi qorǵaýshylary bolady», - dep atap ótti ol «Dáýlet» ulttyq tennıs ortalyǵynda «Sport kúni» aıasynda ótken sharada.
Qazaqstan barysynyń aıtýynsha, búginde týrnırdi ótkizýdiń naqty merzimi men orny talqylaný ústinde. Sonymen qatar, onyń aıtýynsha, bul jarys jyl saıyn ótkizilip turatyn bolady.
«Qazaqstan barysy» 2010 jyldan beri jyl saıyn ótkizilip keledi. Osy ýaqyt aralyǵynda bul joba óziniń ómirsheńdigin dáleldep, halyq arasynda úlken qoldaýǵa ıe boldy.
Aıta keteıik, búgin Astanadaǵy «Dáýlet» ulttyq tennıs ortalyǵynda Sport kúnine arnalǵan saltanatty merekelik shara ótti. Oǵan QR Mádenıet jáne sport mınıstri Arystanbek Muhamedıuly men elimizdiń ataqty sportshylary, sondaı-aq, barlyq sportsúıer qaýym qatysty.
