Bıyl qurylysy uzaqqa sozylǵan 30-dan astam kópqabatty úı tapsyrylady – Jeńis Qasymbek

ASTANA. QazAqparat – Bıyl Astanada 30-dan astam «saqaldy» qurylys aıaqtalady. Osylaısha, 4 myńǵa jýyq úlesker otbasy kópten kútken páteriniń kiltin almaq. Bul týraly ortalyq kommýnıkatsııalar qyzmetinde ótken brıfıngide Astana ákimi Jeńis Qasymbek aıtty, dep habarlaıdy QazAqparat tilshisi.

«Memleket basshysynyń tapsyrmasyna sáıkes, uzaq qurylystardy aıaqtaý boıynsha aýqymdy júıeli jumys júrip jatyr. Osyǵan deıin 150-den astam kóppáterli turǵyn úı kesheniniń ishinde 120-synyń qurylysy aıaqtalǵan bolatyn. Bıyl 30-dan astam «saqaldy» qurylysty aıaqtaımyz. Onyń árqaısysynyń jaǵdaıy ártúrli. Mysaly, «Turan Syǵanaq» turǵyn úı kesheni 6 jyl buryn problemaly dep tanyldy. Bul úıdiń bloktarynyń bir bóligi birneshe qabatqa ǵana kóterilgen bolsa, keıbir bloktarynda jumys tipti bastalmaǵan da edi. «Arystan blok 1» kesheniniń qurylysy 11 jyl buryn bastalǵan, al «Hazar» turǵyn úı kesheniniń qurylysy úsh qabat deńgeıinde toqtatylǵan. Mundaı mysaldar jetkilikti. Biraq árbir uzaq qurylys boıynsha qadamdyq is-sharalar jospary bar», – dedi Jeńis Qasymbek.

Sondaı-aq, shahar basshysy qurylys kompanııalary zańnamada kózdelgen naqty talaptarǵa sáıkes kelgen kezde ǵana úleskerler qarajatyn qabyldaı alatynyn atap ótti.

Atap aıtsaq, turǵyn úı qurylysynyń biryńǵaı operatorynyń kepildigin alý, ekinshi deńgeıdegi banktiń jobasyna qatysý, turǵyn úıdiń qańqasyn turǵyzǵannan keıin ǵana úleskerlerdiń aqshasyn tartýǵa bolady.

Sondaı-aq, qala turǵyndaryn aqparattandyrý jáne zańnyń buzylýyna jol bermeý maqsatynda ákimdiktiń resmı resýrstarynda jáne BAQ-ta úleskerlerdiń qarajatyn qabyldaýǵa quqyǵy joq qurylys salýshylardyń «qara tizimi» júıeli túrde jarııalanady.